5 верасня, Мінск /Кар. БЕЛТА/. У Мінску завяршыўся чарговы сезон Нацыянальнай баскетбольнай лігі 3х3. У бягучым годзе ў спаборніцтвах каля Палаца спорту выступілі больш за 180 каманд з Беларусі, Кітая і Расіі, паведамляе карэспандэнт БЕЛТА.
У самай прэстыжнай катэгорыі "Эліта" пераможцамі фіналу сталі спартсмены расійскай каманды "Руна", якія ў вырашальным паядынку абыгралі пераможцу двух этапаў цяперашняга сезона "Астравец" з лікам 21:14. Бронзу заваявалі баскетбалісты клуба "Расатамтэх". Лепшым іграком прызнаны адзін з лідараў пераможцаў Ілья Сідарэнка. Пасля заканчэння спаборніцтваў ён адзначыў, што турнір вельмі класны: "Перамога далася цяжка: усе сапернікі аказалі ўпартае супраціўленне і паказалі сапраўдны байцоўскі характар, змагаючыся да апошніх секунд кожнага паядынку". У гэтым сезоне пераможцамі этапаў у "Эліце" таксама станавіліся маладзёжная зборная Беларусі (U-23) і мінскі Mr.Magic.
У фінальных спаборніцтвах дзяўчат мацнейшай была гродзенская "Алімпія", на другой пазіцыі Sprint, бронзу заваявалі баскетбалісткі Game Sisters. Лепшым іграком тут стала лідар сярэбраных прызёраў Кацярына Карпук. У самай масавай катэгорыі "Агульная" першынствавалі спартсмены клуба "3х3ву". У астатніх катэгорыях чэмпіёнамі сталі "Цмокі" (U-13), "Капітошкі" (U-15) і Squirrels (U-18).
Гэты турнір праводзіцца з 2015 года, і кожны сезон у ім гуляе ўсё больш баскетбалістаў усіх узростаў. Разам з аматарамі на пляцоўку выходзяць майстры з прафесійных клубаў і нацыянальных зборных.-0-
