13 студзеня, Мінск /Кар. БЕЛТА/. Шасціразоваму алімпійскаму чэмпіёну па спартыўнай гімнастыцы Віталю Шчэрбу 13 студзеня споўнілася 50 гадоў. З юбілеем праслаўленага гімнаста павіншаваў Прэзідэнт НАК Беларусі Віктар Лукашэнка, паведамілі ў прэс-службе арганізацыі.
Беларус належыць да плеяды легендарных атлетаў, імёны якіх па праве ўвайшлі ў сусветную гісторыю спартыўнай гімнастыкі.
"Майстэрства, сабранасць і мэтанакіраванасць не раз дапамагалі вам перамагаць на самых прэстыжных міжнародных спаборніцтвах. За гады адданага служэння спорту вы заваявалі вялікую колькасць высокіх узнагарод і ганаровых тытулаў. Вам не было роўных на Гульнях XXV Алімпіяды ў Барселоне ў 1992 годзе, калі вы змаглі ўстанавіць унікальнае дасягненне ў гісторыі спорту - за адзін дзень выйграць чатыры залатыя алімпійскія медалі", - гаворыцца ў віншаванні.
Прэзідэнт НАК ад усёй душы пажадаў Віталю Шчэрбу моцнага здароўя, аптымізму, удачы на жыццёвым шляху і ажыццяўлення ўсіх планаў і ідэй.
Ураджэнец Мінска Віталь Шчэрба з'яўляецца шасціразовым алімпійскім чэмпіёнам, чатырохразовым бронзавым прызёрам Гульняў, 12-разовым чэмпіёнам свету, 10-разовым чэмпіёнам Еўропы, двухразовым уладальнікам Кубка свету па спартыўнай гімнастыцы.
Дасягненні знакамітага атлета вядомы далёка за межамі Беларусі і адзначаны міжнароднымі ўзнагародамі. Яго поспех на Гульнях XXV Алімпіяды застаецца арыенцірам для многіх маладых гімнастаў.-0-
