27 ліпеня, Мінск /Кар. БЕЛТА/. Галоўнаму трэнеру зборнай Беларусі па мастацкай гімнастыцы Ірыне Ляпарскай сёння споўнілася 65 гадоў. З гэтай значнай падзеяй яе павіншаваў прэзідэнт Нацыянальнага алімпійскага камітэта Віктар Лукашэнка, паведамілі БЕЛТА ў прэс-службе НАК.
Кіраўнік НАК адзначыў, што развіццё і ўмацаванне лепшых традыцый айчыннай школы мастацкай гімнастыкі немагчыма было б без упартай працы ўсёй нацыянальнай каманды. У віншаванні таксама гаворыцца: "Выдатны трэнер і педагог, цудоўны настаўнік, вы выхавалі цэлую плеяду чэмпіёнаў, якімі ганарыцца краіна. На працягу многіх гадоў унікальны вопыт, талент і майстэрства даюць магчымасць вам і ўсёй нацыянальнай камандзе дабівацца гучных поспехаў, карыстацца павагай замежных калег, якія прызнаюць вас як аднаго з самых аўтарытэтных спецыялістаў у свеце мастацкай гімнастыкі". Віктар Лукашэнка пажадаў імянінніцы моцнага здароўя, дабрабыту, поспехаў і новых перамог на карысць развіцця беларускага спорту.
Ірына Ляпарская пасадзейнічала станаўленню многіх вядомых спартсменак, сярод якіх алімпійская чэмпіёнка Марына Лобач, прызёры Алімпіяд, чэмпіянатаў свету і Еўропы Юлія Раскіна, Іна Жукава, Любоў Чаркашына, Ксенія Санковіч, Аліна Гарнасько і іншыя беларускія "мастачкі".-0-
