4 лютага, Мінск /Кар. БЕЛТА/. Прэзідэнт Нацыянальнага алімпійскага камітэта Віктар Лукашэнка звярнуўся з прывітальным словам да ўдзельнікаў XXIV зімовых Алімпійскіх гульняў у Пекіне, паведамілі БЕЛТА ў НАК.
"Алімпійскія гульні - асаблівыя спаборніцтвы. У наш час алімпійскі рух павінен заставацца магутнай сілай, якая аб'ядноўвае ўвесь свет. Дасягненні айчынных спартсменаў прымушаюць гаварыць пра беларусаў як аб спартыўнай нацыі. Упэўнены, што ва ўмовах абвостранай канкурэнцыі нашы атлеты змогуць з гонарам прадставіць нашу краіну ў Пекіне", - гаворыцца ў прывітанні.
Прэзідэнт НАК адзначыў, што для беларускіх атлетаў Гульні ў Пекіне стануць чарговым экзаменам чатырохгоддзя. Звяртаючыся да іх, ён адзначыў: "Наша дзяржава зрабіла ўсё неабходнае для таго, каб вы мелі магчымасць спакойна падрыхтавацца і дастойна выступіць на гэтых спаборніцтвах. Перамога на алімпійскіх арэнах - лепшая візітная картка краіны і прадмет асаблівага гонару для ўсіх беларусаў. Кожная перамога, кожны новы рэкорд - магутны стымул развіцця масавай фізічнай культуры. Усе беларускія балельшчыкі і аматары спорту вераць у тое, што на XXIV зімовых Алімпійскіх гульнях у Пекіне вы зможаце дасягнуць высокіх рэзультатаў і папоўніце скарбонку алімпійскіх узнагарод".
Віктар Лукашэнка пажадаў удзельнікам моцнага здароўя, паспяховага выступлення, веры ў сябе, байцоўскага настрою і гучных перамог.
XXIV зімовыя Алімпійскія гульні пройдуць з 4 па 20 лютага. Беларускія атлеты будуць змагацца за ўзнагароды ў шасці відах спорту: біятлон, фрыстайл, канькабежны спорт, лыжныя гонкі, фігурнае катанне, горныя лыжы.-0-
