4 сакавіка, Мінск /Кар. БЕЛТА/. Прэзідэнт НАК Беларусі Віктар Лукашэнка на сумесным пасяджэнні НАК краіны і Мінспорту са спартыўнымі федэрацыямі адрэагаваў на націск з боку МАК і міжнародных федэрацый, паведамілі БЕЛТА ў прэс-службе НАК.
Раней Міжнародны алімпійскі камітэт рэкамендаваў спартыўным федэрацыям па ўсім свеце не дапускаць да ўдзелу ў спаборніцтвах беларускіх і расійскіх атлетаў. На бягучым тыдні рашэнні па адхіленні спартсменаў з Беларусі і Расіі прынялі ў тым ліку міжнародныя федэрацыі хакея (IIHF), валейбола (FIVB), лыжнага спорту (FIS).
"Наша задача - данесці да сусветнай спартыўнай грамадскасці, што маўчаць мы не будзем. У такіх умовах нам неабходна прыняць шэраг крокаў, каб захаваць і развіваць спорт, выбудаваць адносіны з дружалюбнымі федэрацыямі іншых краін", - адзначыў Віктар Лукашэнка.
Міністр спорту і турызму Беларусі Сяргей Кавальчук заявіў, што націск на беларускі спорт павялічваецца з кожным днём. "Беларускія спартсмены і нашы федэрацыі не парушылі ніводнай прававой нормы. У самы кароткі тэрмін неабходна атрымаць ад міжнародных федэрацый падрабязныя растлумачэнні, чаму былі вынесены такія рэкамендацыі", - падкрэсліў Сяргей Кавальчук.-0-
