Сцяг Панядзелак, 22 ліпеня 2024
Усе навіны
Усе навіны
Спорт
19 студзеня 2024, 12:19

Першынство Віцебскай вобласці па біятлоне прыме Гарадок 19-20 студзеня

19 студзеня, Віцебск /Кар. БЕЛТА/. Адкрытае першынство Віцебскай вобласці па біятлоне пройдзе ў Гарадку 19-20 студзеня. Аб гэтым карэспандэнту БЕЛТА паведаміў старшы трэнер зборнай Віцебскай вобласці па біятлоне Сяргей Белапухаў.

Спаборніцтвы збяруць юных біятланістаў з розных куткоў паўночнага рэгіёна. Паводле папярэдніх даных, чакаецца 16 каманд з Віцебска, Наваполацка, Сянно, Талачына, Новалукомля, Гарадка, Шуміліна, а таксама Аршанскага, Браслаўскага і Чашніцкага раёнаў. За перамогу паспрачаюцца выхаванцы раённых ДЮСШ, СДЮШАР "Алімпіец" і іншых спартыўных школ.

Біятланісты выступяць у чатырох узроставых групах. Першыя з 24 камплектаў медалёў разыграюць сёння. Гонка з масавым стартам у юнакоў і дзяўчат 2005-2006 г.н. пачнецца ў 15.30. Юнакоў чакае дыстанцыя 10 км, дзяўчатам трэба будзе пераадолець 7,5 км. Мас-старты астатніх узроставых груп (малодшых) запланаваны на суботу, 20 студзеня.

"Першынство вобласці - у праграме адбору каманды на кубак Беларускай федэрацыі біятлона, які таксама пройдзе ў Гарадку 24-27 студзеня, - адзначыў Сяргей Белапухаў. - У старэйшых узроставых групах адбіраюцца па 4 хлопчыкі і 4 дзяўчынкі, а ў малодшых - па тры ў каманду. Для спартсмена першынство з'яўляецца вельмі важным адборачным спаборніцтвам для таго, каб трапіць у нацыянальную каманду. Калі спартсмен застаецца лідарам, пераходзячы ў наступныя ўзроставыя групы, яго разглядаюць трэнеры нацыянальнай каманды (юнацкай або юніёрскай) і забіраюць на падрыхтоўку ў Рэспубліканскі цэнтр алімпійскай падрыхтоўкі па зімовых відах спорту "Раўбічы". Шмат спартсменаў, якія пачыналі з вобласці, траплялі на кубак па біятлоне, далей трэніруюцца ўжо ў юніёрскай, юнацкай камандзе Рэспублікі Беларусь".

У ліку ўдзельнікаў цяперашніх спаборніцтваў у Гарадку будуць біятланісты, якія ўжо выканалі нарматывы кандыдатаў у майстры спорту. "Як правіла, гэта старэйшая юнацкая група 2005-2006 г.н., - растлумачыў Сяргей Белапухаў. - Дарэчы, гэтыя ж спартсмены толькі што вярнуліся з алімпійскіх Дзён моладзі Рэспублікі Беларусь, дзе ў агульнакамандным заліку наша вобласць заняла другое месца".-0-
Падпісвайцеся на нас у
Twitter
Топ-навіны
Свежыя навіны Беларусі