1 снежня, Мінск /Кар. БЕЛТА/. Паралімпійскі камітэт Беларусі накіраваў апеляцыю ў трыбунал Міжнароднага паралімпійскага камітэта (ІРС) наконт неправамернага рашэння аб прыпыненні членства Беларусі ў IPC. Аб гэтым 1 снежня расказаў журналістам старшыня Паралімпійскага камітэта Беларусі Алег Шэпель, паведамляе карэспандэнт БЕЛТА.
Алег Шэпель яшчэ раз падкрэсліў, што рашэнне, прынятае на нядаўняй пазачарговай генасамблеі IPC у Берліне, прынята з парушэннямі. Ён таксама паведаміў, што беларускі бок падрыхтаваў канкрэтныя матэрыялы аб тым, што наша краіна не парушыла ні аднаго пункта новай Канстытуцыі Міжнароднага паралімпійскага камітэта, прынятай усяго паўгода таму. На генасамблеі яны былі перададзены замежным калегам і кіраўніцтву IPC. "Тым не менш было зроблена ўсё, каб даць ход рашэнню аб адхіленні Беларусі і Расіі ад сусветнай паралімпійскай сям'і. Безумоўна, гэта раскол у сусветным паралімпійскім руху", - адзначыў Алег Шэпель. Акрамя таго, ужо ў Берліне IPC зноў унёс змяненні ў свой асноўны закон. У прыватнасці, выканкаму цяпер дазволена адхіляць ад удзелу ў спаборніцтвах спартсменаў і трэнераў, а таксама цэлыя каманды без тлумачэння прычын.
Старшыня Паралімпійскага камітэта таксама сказаў, што штаб-кватэра IPC знаходзіцца ў Боне, і ў сувязі з гэтым Паралімпійскі камітэт Беларусі разам з нямецкімі адвакатамі правёў падрыхтоўку да падачы іска аб дапушчаных парушэннях у суд ФРГ. Згодна з германскімі законамі на тэрыторыі ФРГ не дапускаецца дыскрымінацыя па нацыянальнай прыкмеце, мове і палітычных поглядах.
У IPC цяпер уваходзяць 184 арганізацыі - нацыянальныя і рэгіянальныя камітэты, а таксама федэрацыі па відах спорту, нагадаў Алег Шэпель. А падчас правядзення пазачарговай асамблеі IPC у Берліне за выключэнне беларусаў прагаласавалі 54 члены, супраць - 45, устрымаліся - 18. Да таго ж варта ўлічыць, што перад галасаваннем з многімі была праведзена пэўная работа - як "правільна" галасаваць. У прыватнасці, прадстаўнікам Лацінскай Амерыкі была абяцана фінансавая падтрымка ў выпадку выканання "пажаданняў" кіраўніцтва. Больш таго, прадстаўнікі многіх краін Заходняй Еўропы, а таксама ЗША і Канады ў кулуарах практычна не ўтойвалі, што яны ледзь не выконваюць заказ сваіх палітыкаў па адхіленні беларусаў і расіян. Акрамя таго, у сталіцу Германіі не змаглі прыехаць дэлегацыі многіх постсавецкіх краін, а таксама азіяцкіх дзяржаў, у прыватнасці Ірана, - ім не выдалі ўязныя візы. Такім чынам, зноў гэтыя рашэнні прымаюцца, каб дагадзіць палітыканам, а не спартыўнаму духу і прынцыпам алімпійскага руху.-0-
