27 лістапада, Мінск /Кар. БЕЛТА/. Новым старшынёй Беларускай федэрацыі валейбола сёння ў Мінску выбраны былы ігрок нацыянальнай зборнай Эдуард Венскі, перадае карэспандэнт БЕЛТА.
Кар'ера іграка Эдуарда Венскага пачыналася ў гродзенскім "Камунальніку", пасля ён чатырнаццаць сезонаў правёў у чэмпіянаце Фінляндыі, выступаючы за клуб "ВяЛеПа", быў прызнаны лепшым іграком фінскага чэмпіянату. У сезоне-2017/2018 вярнуўся ў Беларусь і дапамог салігорскаму "Шахцёру" выйграць другі чэмпіёнскі тытул запар. Пасля заканчэння кар'еры заняў пасаду дырэктара Беларускай федэрацыі валейбола.
"На пасадзе старшыні разлічваю на вопыт калег у развіцці віду спорту. Вядома, ёсць ідэі, як вывесці на новы ўзровень беларускі валейбол. Аднак рэалізаваць усе планы мы можам сумесна, усёй спартыўнай супольнасцю", - адзначыў Эдуард Венскі.
Раней з 1999 па восень 2014 года Беларускую федэрацыю валейбола ўзначальваў Барыс Батура, на пасадзе кіраўніка БФВ яго змяніў Валянцін Шаеў, а з мая 2017 - былы арбітр Міжнароднай федэрацыі валейбола (ФІВБ) Аляксандр Пясецкі. Ранейшы кіраўнік федэрацыі з-за занятасці па асноўным месцы работы пакінуў гэту грамадскую пасаду.-0-
