2 верасня, Мінск /Кар. БЕЛТА/. Сёння матчам за Суперкубак сярод жаночых каманд у Беларусі афіцыйна адкрыецца новы гандбольны сезон. У гісторыі беларускага гандбола ўпершыню праводзяцца паядынкі за гэты прыз, паведамляе карэспандэнт БЕЛТА.
У барацьбе за першы трафей сезона чэмпіёнкі краіны гандбалісткі "Гомеля" прымуць на сваёй пляцоўцы сярэбраных прызёраў мінулага нацыянальнага першынства гандбалістак "БНТУ-БелАЗа" (пачатак гульні ў 17.30; прамая трансляцыя на тэлеканале "Беларусь 5"). Стартавы паядынак 31-га жаночага чэмпіянату Беларусі таксама пройдзе ў Гомелі - 7 верасня гаспадыні сустрэнуцца з гандбалісткамі "Віцябчанкі".
Заўтра пачнецца мужчынскае першынство краіны - у сталічным Доме гандбола віцэ-чэмпіёны і ўладальнікі Кубка Беларусі гандбалісты мінскага СКА праэкзаменуюць сваю даччыную каманду БДУФК-СКА. Паядынак за Суперкубак сярод мужчын адбудзецца 10 верасня - на паркеце брэсцкага спартыўнага комплексу "Вікторыя" чэмпіёны краіны гандбалісты клуба "Мяшкоў Брэст" сустрэнуцца са СКА.-0-
