27 снежня, Мінск /Кар. БЕЛТА/. Пасля завяршэння 46-га маладзёжнага чэмпіянату свету па хакеі, які ўчора стартаваў у Канадзе, ні адна каманда не пакіне элітны дывізіён. Такое рашэнне прыняла Міжнародная федэрацыя хакея (ІІХФ) у сувязі з пандэміяй каранавіруса, паведамляе карэспандэнт БЕЛТА.
Раней планавалася, што пасля заканчэння папярэдняга этапу каманды, якія зоймуць пятыя месцы ў дзвюх групах, правядуць серыю да дзвюх перамог за права застацца ў эліце маладзёжнага хакея, а цяпер няўдачнікам не давядзецца змагацца за захаванне прапіскі. Такім чынам, у наступным сусветным маладзёжным першынстве, якое праз год пройдзе ў расійскіх Новасібірску і Омску, прымуць удзел не 10, а 11 каманд. Сярод іх будзе і беларуская "маладзёжка", якая нядаўна ў Даніі паспяхова правяла сусветнае першынство ў дывізіёне IA, заняўшы першае месца.
На старце групавога раўнда цяперашняга чэмпіянату планеты ў канадскіх гарадах Эдмантан і Рэд-Дзір ужо адбыліся чатыры паядынкі: А - Канада - Чэхія - 6:3, Фінляндыя - Германія - 3:1; В - Швецыя - Расія - 6:3, ЗША - Славакія - 3:2. Першы этап завершыцца 31 снежня, пасля чаго ў чвэрцьфінал выйдуць па чатыры каманды з дзвюх груп. Матчы 1/4 фіналу пройдуць 2 студзеня, паўфіналы намечаны на 4 студзеня, вырашальны паядынак і матч за бронзавыя медалі адбудуцца 5 студзеня.
У фінале мінулага маладзёжнага планетарнага форуму, які праходзіў у Эдмантане, амерыканцы перайгралі канадцаў - 2:0. У гульні за бронзу фіны аказаліся мацнейшымі за расіян - 4:1.-0-
