НАК Беларусі выказаў неўразуменне пазіцыяй МАК з беларускімі атлетамі

17 чэрвеня, Мінск /Кар. БЕЛТА/. Нацыянальны алімпійскі камітэт Беларусі выказвае неўразуменне наконт першага спіса беларускіх спартсменаў, якія запрошаны МАК для ўдзелу ў Алімпійскіх гульнях у Парыжы, паведамілі БЕЛТА ў прэс-службе НАК.

Неўразуменне і абурэнне выклікаюць непразрыстыя падыходы і вывады так званай камісіі па праверцы нейтральнага статусу спартсмена для допуску да гульняў. Па незразумелых прычынах не дапушчаны да ўдзелу тыя атлеты, якія паспяхова прайшлі праверкі, удзельнічалі ў кваліфікацыйных спаборніцтвах і змаглі выйграць ліцэнзіі, гаворыцца ў заяве НАК.

У той жа час беларускі НАК адзначыў, што апублікаваныя МАК спісы не канчатковыя (прадстаўлены не ўсе віды спорту) і не зацверджаны беларускім бокам афіцыйна. НАК Беларусі прадоўжыць перагаворы з МАК і будзе змагацца індывідуальна за кожнага спартсмена - за яго права выступіць на гульнях.

Канчатковае рашэнне аб тым, хто паедзе на Алімпіяду ў Парыж, будзе прынята НАК сумесна з федэрацыямі па відах спорту, а таксама спартсменамі. Пры гэтым адзін з асноўных аб'ектыўных прынцыпаў: павінны выступаць толькі тыя, хто змог заваяваць ліцэнзію на гульні ў жорсткіх, абмежаваных і дыскрымінацыйных умовах, якія склаліся ў сусветным спорце на сённяшні дзень.-0-