22 сакавіка, Мінск /Кар. БЕЛТА/. У гэты дзень у 1991 годзе быў заснаваны Нацыянальны алімпійскі камітэт Рэспублікі Беларусь, паведамляе БЕЛТА са спасылкай на прэс-службу НАК.
9 сакавіка 1992 года НАК Беларусі быў прызнаны Міжнародным алімпійскім камітэтам у якасці часовага члена арганізацыі. Праз паўтара года, 21-24 верасня 1993 года, на 101-й сесіі МАК у Манака НАК Беларусі стаў паўнапраўным членам сусветнай алімпійскай сям'і. Рэспубліка Беларусь атрымала права дэлегаваць на Алімпійскія гульні сваю нацыянальную каманду.
Першым прэзідэнтам НАК Беларусі быў выбраны Уладзімір Рыжанкоў. У 1997 годзе НАК узначаліў Прэзідэнт Беларусі Аляксандр Лукашэнка, які займаў гэту пасаду на працягу 24 гадоў. У 2021 годзе новым кіраўніком спартыўнай арганізацыі стаў Віктар Лукашэнка.
Пасля стварэння НАК Беларусі спартсмены краіны выступілі на 15 Алімпійскіх гульнях - 8 зімовых і 7 летніх. Яны заваявалі 105 медалёў: 21 залаты, 37 сярэбраных і 47 бронзавых.-0-
