22 студзеня, Мінск /Кар. БЕЛТА/. На футбольных Кубку Азіі і Кубку афрыканскіх нацый завершаны другія туры групавых этапаў, паведамляе карэспандэнт БЕЛТА.
На Кубку Азіі, які праходзіць у Катары, пасля другога тура вызначыліся адразу пяць удзельнікаў адной восьмай фіналу. У групе А датэрмінова першынствавалі гаспадары турніру, якія абыгралі каманды Лівана (3:0) і Таджыкістана (1:0). На другім месцы пакуль ідзе зборная Кітая. У квартэце В пуцёўку ў плэй-оф забраніравалі аўстралійцы, якія стартавалі з перамог над футбалістамі Індыі (2:0) і Сірыі (1:0). Блізкая да праходу далей і каманда Узбекістана, у яе актыве 4 пункты пасля двух матчаў. У пуле С шэсць ачкоў з шасці набрала зборная Ірана, якая засмуціла Палесціну (4:1) і Ганконг (1:0). Хутчэй за ўсё ў 1/8 фіналу акажацца каманда ААЭ, якая ідзе пакуль другой з чатырма баламі.
У групе D нечакана лідзіруюць футбалісты Ірака, якія спачатку разабраліся з Інданезіяй (3:1), а потым нанеслі сенсацыйнае паражэнне галоўным прэтэндэнтам на перамогу ў Кубку з Японіі (2:1). За тур да заканчэння этапу японцы дзеляць з інданезійцамі другі радок у квартэце, замыкае табліцу В'етнам з нулём ачкоў. У пуле F без страт ідзе толькі зборная Саудаўскай Аравіі, у актыве якой перамогі над Аманам (2:1) і Кыргызстанам (2:0). На два балы ад саудаўцаў адстае каманда Тайланда. Яўнага фаварыта няма толькі ў групе E, дзе першую пазіцыю падзяляюць Паўднёвая Карэя і Іарданія. У апошнім туры карэйцам гуляць з аўтсайдарамі квартэта малайзійцамі, а вось Іарданія сустрэнецца з Бахрэйнам, які таксама прэтэндуе на прамы праход далей.
На Кубку афрыканскіх нацый, які прымае Кот-д’Івуар, пасля двух тураў вядомы ўсяго дзве каманды - удзельніцы наступнай стадыі. Першай стала зборная Каба-Вердэ, якая стартавала ў пуле В з перамог над Ганай (2:1) і Мазамбікам (3:0). Далей прадстаўнікоў астравоў Зялёнага Мыса чакае матч з камандай Егіпта. Яшчэ адзін білет у плэй-оф атрымалі дзеючыя чэмпіёны Афрыкі з Сенегала, якія раней абыгралі Гамбію (3:0) і Камерун (3:1). Амаль напэўна ў 1/8 фіналу з групы С выйдзе і зборная Гвінеі, у якой ужо чатыры ачкі. Гаспадары розыгрышу івуарыйцы, якія выступаюць у квартэце А, пакуль толькі трэція, яны ўступаюць адзін бал камандам Нігерыі і Экватарыяльнай Гвінеі. Два паражэнні ў двух матчах тут пацярпелі футбалісты Гвінеі-Бісау.
Напружаная барацьба назіраецца ў пуле D: лідарам групы Анголе і Буркіна-Фасо, якія маюць па чатыры балы, у апошнім туры гуляць паміж сабой, а Алжыр, які ідзе следам, праэкзаменуе аўтсайдараў з Маўрытаніі. У квартэце Е адносна спакойна сябе адчувае зборная Малі, на рахунку якой чатыры ачкі. У трэцім матчы "арлы" сустрэнуцца з не самым грозным сапернікам у асобе Намібіі, а другую пуцёўку ў накаўт-раўнд з гэтай групы павінны разыграць каманды ПАР і Туніса. І, нарэшце, у пуле F праход далей практычна гарантавалі футбалісты Марока, якія на два пункты апярэджваюць зборныя Замбіі і ДР Конга. Замыкае квартэт каманда Танзаніі.
І ў Кубку Азіі, і ў Кубку афрыканскіх нацый у плэй-оф выйдуць па дзве мацнейшыя зборныя з кожнай групы, у адной восьмай фіналу да іх далучацца чатыры лепшыя каманды, якія зоймуць трэція месцы.-0-
