23 сакавіка, Мінск /Кар. БЕЛТА/. На футбольных арэнах Старога Свету 23 сакавіка стартуе адборачны турнір чэмпіянату Еўропы 2024 года, паведамляе карэспандэнт БЕЛТА.
Цэнтральным паядынкам першага гульнявога дня стане сустрэча ў Неапалі паміж фаварытамі кваліфікацыйнай групы С зборнымі Італіі і Англіі. У другім сённяшнім матчы гэтай групы футбалісты Паўночнай Македоніі прымуць у Скоп'е каманду Мальты. Зборная Украіны прапускае першы тур.
Таксама сёння адбудуцца матчы яшчэ ў дзвюх групах: Н - Казахстан - Славенія, Данія - Фінляндыя, Сан-Марына - Паўночная Ірландыя; J - Боснія і Герцагавіна - Ісландыя, Славакія - Люксембург, Партугалія - Ліхтэнштэйн.
Зборная Беларусі свой стартавы паядынак у кваліфікацыйнай групе I правядзе 25 сакавіка ў сербскім Нові-Садзе супраць каманды Швейцарыі. У гэты ж дзень ізраільцяне прымуць футбалістаў Косава, а каманда Андоры згуляе ў сябе дома з румынамі.
Склады астатніх груп:
А - Іспанія, Грузія, Нарвегія, Шатландыя, Кіпр;
В - Нідэрланды, Францыя, Ірландыя, Грэцыя, Гібралтар;
D - Харватыя, Уэльс, Арменія, Латвія, Турцыя;
Е - Польшча, Чэхія, Фарэрскія астравы, Албанія, Малдова;
F - Бельгія, Швецыя, Аўстрыя, Эстонія, Азербайджан;
G - Венгрыя, Літва, Чарнагорыя, Сербія, Балгарыя.
Матчы адборачнага турніру завершацца 21 лістапада 2023 года. Прамыя пропускі ў фінальную стадыю атрымаюць па дзве лепшыя каманды. Яшчэ тры пуцёўкі будуць разыграны ў стыкавых гульнях у сакавіку 2024 года. Фінальны турнір 17 кантынентальнага першынства з удзелам 24 лепшых дружын Старога Свету пройдзе з 14 чэрвеня па 14 ліпеня 2024 года ў дзесяці гарадах Германіі. Матч адкрыцця адбудзецца ў Мюнхене, а вырашальны паядынак за чэмпіёнскі тытул прыме Алімпійскі стадыён Берліна.-0-
