25 мая, Мінск /Кар. БЕЛТА/. У сувязі з інцыдэнтам, звязаным з Дзяржаўным сцягам Рэспублікі Беларусь на чэмпіянаце свету па хакеі ў Рызе, Міністэрства спорту і турызму накіравала афіцыйнае пісьмо ў адрас Міністэрства адукацыі і навукі Латвійскай Рэспублікі, паведамілі БЕЛТА ў прэс-службе ведамства.
"Спартыўная грамадскасць Рэспублікі Беларусь і Міністэрства спорту і турызму Рэспублікі Беларусь як орган дзяржаўнага кіравання ў сферы фізічнай культуры і спорту лічаць абуральнай і недапушчальнай замену Дзяржаўнага сцяга Рэспублікі Беларусь, прадстаўленага сярод сцягоў краін - удзельніц чэмпіянату свету па хакеі, які праходзіць цяпер у сталіцы Латвіі Рызе, на сцяг з незарэгістраванай сімволікай.
Згодна з інфармацыяй, апублікаванай у СМІ, у змене сцяга прынялі ўдзел мэр Рыгі Марціньш Стакіс і міністр замежных спраў Латвіі Эдгар Рынкевіч.
Герб, сцяг і гімн Рэспублікі Беларусь - гэта не проста сімвалы, гэта візітная картка міралюбівай палітыкі нашай краіны, чый аўтарытэт бясспрэчна прызнаны на міжнароднай арэне, у тым ліку як аднаго з заснавальнікаў Арганізацыі Аб'яднаных Нацый.
У адпаведнасці з Канстытуцыяй Рэспублікі Беларусь дзяржаўныя сімвалы нашай краіны зацверджаны Усенародным рэферэндумам і не могуць быць зменены з выкананнем іншай працэдуры.
Непавага да дзяржаўных сімвалаў Рэспублікі Беларусь з боку афіцыйных асоб Латвійскай Рэспублікі сведчыць аб адсутнасці павагі да волі беларускага народа, парушае прынцыпы міжнароднага права і з'яўляецца недапушчальным у дыпламатычнай практыцы.
Спорт заўсёды быў па-за палітыкай, аб'ядноўваў людзей і прапагандаваў павагу да сапернікаў і сумленную барацьбу. Тым большае недаўменне выклікаюць дзеянні афіцыйных асоб Латвійскай Рэспублікі і маўклівая згода з іх дзеяннямі спартыўных функцыянераў Латвіі.
У сувязі з гэтым Міністэрства спорту і турызму Рэспублікі Беларусь настойвае на выкарыстанні пры правядзенні чэмпіянату свету па хакеі афіцыйнай дзяржаўнай сімволікі Рэспублікі Беларусь і патрабуе ад арганізатараў мерапрыемства неадкладнага ўстаранення дапушчаных парушэнняў", - рэзюмаваў пазіцыю Міністэрства спорту і турызму кіраўнік галіны Сяргей Кавальчук.-0-