21 красавіка, Мінск /Кар. БЕЛТА/. Мінскі СКА заняў 11-е месца ў рэйтынгу лепшых гандбольных клубаў Старога Свету ўсіх часоў. Спіс складзены парталам handball-planet.com на аснове рэзультатаў еўрапейскіх клубных турніраў пачынаючы з 1956 года, паведамляе карэспандэнт БЕЛТА.
За сваю слаўную гісторыю гандбалісты мінскага СКА тройчы выйгравалі галоўны кантынентальны трафей - Кубак еўрапейскіх чэмпіёнаў (1987, 1989, 1990), двойчы станавіліся ўладальнікамі Кубка кубкаў (1983, 1988), па разе выйгралі Суперкубак (1989) і Кубак выкліку (2013). Усе гэтыя поспехі былі дасягнуты пад кіраўніцтвам праслаўленага беларускага трэнера Спартака Мірановіча. Дзякуючы гэтым дасягненням у актыве мінскіх армейцаў 45 заліковых балаў у рэйтынгу.
Лепшы паказчык у іспанскай "Барселоны" - 160 ачкоў, следам за якой размясціліся тры прадстаўнікі нямецкай Бундэслігі: "Гумерсбах" (103 балы), "Кіль" (87,5) і "Магдэбург" (61,25). У топ-10 таксама ўваходзяць: іспанскі "Сьюдад-Рэаль" (55,62), чэшская "Дукла" з Прагі (54,37), нямецкія "Гепінген", "Фленсбург" (па 50), венгерскі "Веспрэм" (48,75) і харвацкі "Заграб" (46,25).
Ачкі ў рэйтынгу налічваліся за ўдзел у паўфіналах, фіналах і за перамогу ў Лізе чэмпіёнаў (у мінулым - Кубак чэмпіёнаў), Кубку кубкаў, Кубку ЕГФ і Кубку выкліку.-0-
