13 кастрычніка, Мінск /Кар. БЕЛТА/. Хакеісты мінскага "Дынама" сёння правядуць чарговы гасцявы матч у рамках рэгулярнага чэмпіянату КХЛ. У саперніках - маскоўскі "Спартак", паведамляе карэспандэнт БЕЛТА.
Падапечныя Крэйга Вудкрафта падыходзяць да гульні ў Маскве маючы сем паражэнняў у васьмі апошніх матчах. Тым не менш папярэдні паядынак "зубры" могуць занесці ў актыў. 11 кастрычніка мінчане ў гасцях навязалі барацьбу безагаворачнаму лідару лігі СКА, уступіўшы толькі ў авертайме (2:3). На гэты момант у дынамаўцаў 17 ачкоў пасля 17 гульняў і 8-я пазіцыя ў Заходняй канферэнцыі. Спад пасля добрага пачатку сезона назіраецца і ў "Спартака": "чырвона-белыя" з 21 балам ідуць на Захадзе 6-мі, аднак у апошніх васьмі матчах масквічы атрымалі ўсяго дзве перамогі.
У бягучым сезоне каманды яшчэ не сустракаліся, у мінулым рэгулярным чэмпіянаце "Дынама" і "Спартак" правялі два вочныя паядынкі і абмяняліся вікторыямі. У Мінску мацнейшымі былі "чырвона-белыя" (2:1), у Маскве дынамаўцы ўзялі рэванш - 4:3. Чарговае процістаянне "зуброў" і "гладыятараў" стартуе ў Палацы спорту "Мегаспорт" у 19.30.-0-
