12 кастрычніка, Мінск /Кар. БЕЛТА/. Хакеісты мінскага "Дынама" ў гасцях уступілі СКА з Санкт-Пецярбурга ў чарговым матчы рэгулярнага чэмпіянату КХЛ, паведамляе карэспандэнт БЕЛТА.
У стартавым перыядзе каманды абмяняліся шайбамі: на гол "армейца" Аляксандра Волкава адказаў дынамавец Павел Варфаламееў, які прадоўжыў сваю рэзультатыўную серыю да пяці матчаў. Наступная трэць засталася за мінчанамі - наша каманда выйшла наперад намаганнямі Джона Гілмара. Для канадскага абаронцы "зуброў" гэты дакладны кідок стаў першым у бягучым сезоне. Лідарства "Дынама", аднак, прадоўжылася нядоўга: гаспадары аднавілі парытэт у дэбюце фінальнага адрэзка. Больш у асноўны час лік не мяняўся, але ў авертайме пецярбуржцы ўсё ж такі былі мацнейшымі - 3:2.
Гэта паражэнне стала для падапечных Крэйга Вудкрафта трэцім запар і сёмым у апошніх васьмі матчах. Тым не менш "зубры" прадаўжаюць ісці на 8-м радку Заходняй канферэнцыі, маючы 17 балаў. СКА ў сваю чаргу атрымаў 16-ю перамогу ў чэмпіянаце і ўмацаваў лідарства на Захадзе з 33 ачкамі.
Наступны матч "Дынама" правядзе ў чацвер у гасцях у маскоўскага "Спартака", пачатак сустрэчы - у 19.30. Завершаць выязную серыю мінчане 15 кастрычніка матчам супраць "Лакаматыва" з Яраслаўля.-0-
