27 кастрычніка, Мінск /Кар. БЕЛТА/. Мінскае "Дынама" не змагло прабіцца ў фінал клубнага чэмпіянату свету па пляжным футболе, які праходзіць у Маскве, паведамляе карэспандэнт БЕЛТА.
Сёння ў паўфінале дынамаўцы, якіх трэніруе настаўнік нацыянальнай зборнай Беларусі вядомы іспанскі спецыяліст Нікалас Альварада, уступілі дзеючаму пераможцу гэтага турніру партугальскай "Бразе" з лікам 2:6. Мінчане вельмі няўдачна правялі першы перыяд, адразу прапусціўшы тры мячы. Толькі ў самым канцы другога гульнявога адрэзка Анатоль Рабко з пенальці скараціў разрыў у ліку, але дагнаць сапернікаў беларускай камандзе не ўдалося.
Такім чынам сёння вечарам у вырашальным паядынку за першае месца "Брага" на пляцоўцы "ЦСКА Арэны" сустрэнецца з маскоўскім "Лакаматывам", які ў першым сённяшнім паўфінале выйграў у бразільскага "Васка да Гама" з Рыа-дэ-Жанэйра з мінімальнай перавагай у ліку - 4:3. Мінулыя гады абодва цяперашнія фіналісты па два разы выйгравалі клубны чэмпіянат свету. У гульні за трэцяе месца "Дынама" згуляе з "Васка да Гама".
Учора мінчане ва ўпартай барацьбе абыгралі маскоўскі "Спартак" з лікам 5:4. У складзе "Дынама" па два разы вызначыліся Яўген Новікаў і Паўліньё, а пераможны мяч забіў Ягор Гардзецкі.
У вырашальным матчы мінулага сезона клубнага першынства планеты "Брага" разграміла маскоўскі "Спартак" з рэзультатам 8:3.-0-