16 студзеня, Мінск /Кар. БЕЛТА/. Нападаючы зборнай Аргенціны і амерыканскага клуба "Інтэр Маямі" Ліянэль Месі прызнаны лепшым футбалістам планеты сезона-2022/23 па версіі Міжнароднай федэрацыі футбола (ФІФА), паведамляе карэспандэнт БЕЛТА.
Па выніках галасавання 36-гадовы капітан аргенцінскай зборнай набраў 48 балаў, як і форвард зборнай Нарвегіі і англійскага "Манчэстэр Сіці" Эрлінг Холан. Месі апярэдзіў нарвежца дзякуючы большай колькасці першых месцаў ад капітанаў нацыянальных зборных, якія прымалі ўдзел у апытанні. Ліянэль Месі трэці раз стаў лаўрэатам прэміі The Best, што была заснавана ФІФА ў 2016 годзе. Акрамя яго лепшымі ігракамі свету па два разы прызнаваліся паляк Роберт Левандоўскі (2020, 2021) і партугалец Крышціяну Раналду (2016, 2017), у 2018 годзе прыз атрымаў харват Лука Модрыч.
Лепшай футбалісткай планеты мінулага сезона стала лідар іспанскай зборнай і "Барселоны" Айтана Банмаці. Лепшым трэнерам мужчынскіх каманд названы іспанскі настаўнік "Манчэстэр Сіці" Хасэп Гвардзіёла, а ў жанчын узнагароды ўдастоена галоўны трэнер зборнай Англіі Сарына Вігман з Нідэрландаў. Аўтарам самага прыгожага гола прызнаны хаўбэк бразільскага "Батафога" Гільерме Мадруга.-0-
