10 верасня, Мінск /Кар. БЕЛТА/. Выканаўчы камітэт Міжнароднага алімпійскага камітэта (МАК) адобрыў заснаванне міжнароднага сертыфіката супрацоўніка па ахове здароўя ў спорце, паведамілі БЕЛТА ў прэс-службе НАК Беларусі.
Пяцімесячны вучэбны курс распрацаваны кансультацыйным саветам экспертаў МАК і будзе ўзгоднены з іншымі міжнароднымі арганізацыямі па абароне спартсменаў, згодна з праграмамі Арганізацыі Аб'яднаных Нацый на перыяд да 2030 года.
Заняткі пройдуць на платформе sportsoracle. Рэгістрацыя на платны курс будзе адкрыта для ўсіх жадаючых, а таксама людзей, рэкамендаваных НАКамі, міжнароднымі і нацыянальнымі федэрацыямі па відах спорту. Кандыдаты ад алімпійскіх камітэтаў сваіх краін змогуць падаць заяўку на атрыманне стыпендый Алімпійскай салідарнасці для паступлення на гэты курс.
"Бяспека, дабрабыт і абарона правоў спартсменаў маюць першараднае значэнне для МАК і алімпійскага руху. Я рады, што мы можам ініцыяваць вучобу на атрыманне сертыфіката для павышэння дасведчанасці і асветы ў гэтай важнай сферы для спартсменаў, умацоўваючы пазіцыі супраць усіх форм уціску і злоўжыванняў у спорце", - сказаў прэзідэнт МАК Томас Бах.
У маі бягучага года Сусветная арганізацыя аховы здароўя (СААЗ) і МАК падпісалі пагадненне аб супрацоўніцтве ў інтарэсах умацавання здароўя праз спорт і фізічную актыўнасць.
Акрамя таго, з кастрычніка 2020 года будуць даступны 11 дадатковых вебінараў для НАКаў на чатырох мовах. Яны прызначаны для вырашэння праблем, з якімі сутыкаюцца нацыянальныя алімпійскія камітэты пры распрацоўцы і ажыццяўленні ініцыятыў па абароне спартсменаў, садзейнічанні абмену перадавым вопытам.
МАК таксама плануе правесці лічбавую адукацыйную і асветную кампанію на платформе Athlete365 па бяспечным спорце, якая стартуе ў чацвёртым квартале 2020 года. Акцыя будзе накіравана на павышэнне глабальнай інфармаванасці аб бяспечным спорце напярэдадні Алімпійскіх гульняў у Токіа.
Асноўным прынцыпам лічбавай адукацыйнай і інфармацыйна-асветнай кампаніі з'яўляецца абарона спартсменаў, цэласнасці спорту і прапаганда спартыўных каштоўнасцей пры дапамозе навучання і пашырэння правоў і магчымасцей атлетаў.-0-
