18 лютага, Мінск /Кар. БЕЛТА/. Выканкам Міжнароднага алімпійскага камітэта пачаў вырашэнне пытання аб удзеле непаўналетніх спартсменаў у Алімпійскіх гульнях. Аб гэтым сёння праінфармаваў журналістаў прэзідэнт МАК Томас Бах.
"Ёсць пытанні, якія неабходна вырашыць, гэта датычыцца праблемы непаўналетніх на спаборніцтвах для дарослых. Наш выканкам пачаў думаць аб гэтым, гэта патрабуе ўважлівага абмеркавання і кансультацый", - сказаў Бах. Паводле яго слоў, да абмеркавання пытання неабходна далучыць як прадстаўнікоў Сусветнага антыдопінгавага агенцтва (WADA), так і міжнародныя і нацыянальныя федэрацыі па відах спорту. Пры гэтым, як адзначыў Бах, рашэнне па павелічэнні мінімальнага ўзросту ўдзелу ў Гульнях павінны прымаць прадстаўнікі федэрацый.
Тэма ўдзелу непаўналетніх спартсменаў у Алімпійскіх гульнях узнікла пасля допінгавага скандалу вакол 15-гадовай расійскай фігурысткі Камілы Валіевай. У складзе расійскай зборнай яна стала пераможцай каманднага турніру пекінскай Алімпіяды. Аднак у сувязі з праблемай, якая ўзнікла, узнагароджанне прызёраў у гэтай намінацыі было перанесена на няпэўны тэрмін.-0-
