11 лютага, Мінск /Кар. БЕЛТА/. МАК выступіў з афіцыйнай заявай аб імкненні да гендарнай роўнасці ў алімпійскім руху. Інклюзіўнасць, разнастайнасць і гендарная роўнасць з'яўляюцца неад'емнымі кампанентамі работы арганізацыі, паведамляе прэс-служба НАК Беларусі.
Такім чынам, МАК ацаніў скандальныя выказванні кіраўніка аргкамітэта Токіа-2020 Ёсіра Моры, які падчас нядаўняга пасяджэння Алімпійскага камітэта Японіі паскардзіўся на імкненне арганізацыі да гендарнай разнастайнасці ў кіруючых структурах. Ён папрасіў прабачэння і пазней зрабіў шэраг каментарыяў, аднак гэтыя словы выклікалі негатыўную рэакцыю не толькі ў краіне, але і за яе межамі. У выніку яны былі названы абсалютна недарэчнымі і супярэчнымі прынцыпам МАК і рэформам яго алімпійскага парадку дня.
На працягу апошніх 25 гадоў ведамства Томаса Баха адыгрывае важную ролю ў пашырэнні прысутнасці жанчын у спорце, і ён будзе прадаўжаць дабівацца гэтых мэт. Міжнародны алімпійскі камітэт ужо зрабіў шэраг прынцыповых крокаў у забеспячэнні гендарнай роўнасці. На Алімпійскіх гульнях у Токіа 49 працэнтаў удзельнікаў - жанчыны, што зробіць Гульні-2020 найбольш збалансаванымі па гендарнай прыкмеце.
МАК звярнуўся да ўсіх 206 нацыянальных алімпійскіх камітэтаў з просьбай уключыць у свае алімпійскія каманды як мінімум адну жанчыну і аднаго мужчыну. На цырымоніі адкрыцця маючых адбыцца Гульняў сцяг кожнай краіны плануюць несці адзін мужчына-спартсмен і адна жанчына-спартсменка.
Кіраўніком місіі алімпійскай каманды МАК па справах бежанцаў назначана Тэгла Ларупэ. Яна з'яўляецца трохразовай алімпійскай чэмпіёнкай і рэкардсменкай свету на працягу многіх гадоў у марафонскім бегу.
Першым віцэ-прэзідэнтам МАК на Алімпійскіх гульнях 2020 года ў Токіа стане Аніта Дэфранц, бронзавы прызёр летніх Алімпійскіх гульняў 1976 года ў Манрэалі, афраамерыканка, якая з'яўляецца першапраходцам у справе пашырэння правоў і магчымасцей жанчын.
Камісія спартсменаў МАК складаецца з 11 жанчын і 6 мужчын. Старшынёй камісіі і членам выканкама МАК з'яўляецца Кірсці Ковентры, пяціразовая алімпійская чэмпіёнка і ўладальніца сямі алімпійскіх медалёў. Намеснікам старшыні з'яўляецца Данка Бартэкава, трохразовая алімпійская чэмпіёнка і бронзавы прызёр Алімпійскіх гульняў 2012 года ў Лондане, якая таксама прайшла ўжо кваліфікацыю на Алімпійскія Гульні 2020 года ў Токіа.
Сёння членства жанчын у МАК складае 37,5 працэнта ў параўнанні з 21 працэнтам у пачатку алімпійскага парадку дня - 2020. Жанчыны складаюць 53 працэнты адміністрацыі МАК.
Як адзначаецца ў заяве, усе зацікаўленыя бакі алімпійскага руху і шырокая грамадскасць могуць быць упэўнены ў тым, што МАК прадоўжыць выконваць свае абавязацельствы па забеспячэнні гендарнай роўнасці, інклюзіўнасці, салідарнасці і недыскрымінацыі.-0-
