4 красавіка, Мінск /Кар. БЕЛТА/. Прэзідэнт Беларусі Аляксандр Лукашэнка па выніках праведзенай нарады падтрымаў унесеныя прапановы па ўдасканаленні сістэмы падтрымкі ў спорце. Аб гэтым заявіў журналістам міністр спорту і турызму Сяргей Кавальчук, перадае карэспандэнт БЕЛТА.
"Усё падтрымана. Усе нашы падыходы падтрыманы, - сказаў міністр. - Мы плануем указ распрацаваць да 1 ліпеня. Сам ён ужо ёсць у чарнавым варыянце, праект ёсць і дадаткі да яго. Пакетным прынцыпам унесці і з 1 студзеня 2026 года, калі пачнецца новы фінансавы год, па новых прынцыпах ужо працаваць".
Сяргей Кавальчук адзначыў, што падыходы, закладзеныя ва ўказе нумар 191 аб аказанні падтрымкі арганізацыям фізічнай культуры і спорту ўжо крыху ўстарэлі. Дакумент прымаўся яшчэ ў 2013 годзе. "Падыходы трэба памяняць. Павінна быць справядлівае, рацыянальнае, эфектыўнае размеркаванне ўкладзеных сродкаў. Мы павінны кожную капейку лічыць", - адзначыў ён.
Міністр звярнуў увагу, што ёсць віды спорту або клубы, якія даволі добра фінансуюцца за кошт спонсараў. У іншых жа такіх сродкаў няма. Але менавіта ад фінансавага складніка далёка не заўсёды залежаць і спартыўныя рэзультаты, і ўзровень спартсменаў. "Дзе на самай справе спартсмены лепшыя, больш таленавітыя, дзеці (гаворка пра дзіцяча-юнацкі спорт. - Заўвага БЕЛТА) лепшыя, вельмі складана вызначыць, асабліва на раннім этапе. Таму трэба раўнамерна, правільна гэтыя сродкі размеркаваць", - заявіў кіраўнік Мінспорту.
Другая задача - стварыць правільную сістэму кантролю, каб бачыць, як і на што расходуюцца сродкі. Паводле даных міністра, цяпер асноўная схема - гэта бюджэтнае фінансаванне, 80 працэнтаў клубаў - гэта дзяржаўныя бюджэтныя ўстановы. Што датычыцца астатніх, то ім прапануецца або самастойна шукаць сродкі, або працаваць па нормах, якія распрацавала дзяржава.
"Урад, Міністэрства спорту і турызму, НАК павінны ў бліжэйшы час выпрацаваць і дапрацаваць гэтыя падыходы і ўнесці на разгляд кіраўніка дзяржавы ўказ, які вызначыць усе напрамкі, па якіх мы павінны далей працаваць", - заявіў Сяргей Кавальчук.
Агучаныя на нарадзе Сяргеем Кавальчуком прапановы датычыліся пытанняў размеркавання падатковай падтрымкі і субсідый, сродкаў, якія атрымліваюцца ад дзяржарганізацый, удасканалення сістэмы аплаты працы ў клубах, стварэння агульнакаманднага прызавога фонду, забеспячэння ўмоў для клубаў і федэрацый, каб яны маглі зарабляць уласныя сродкі, у тым ліку за кошт прадпрымальніцкай дзейнасці.
Прапанавана захаваць абавязак клубаў накіроўваць на дзіцяча-юнацкі спорт частку сродкаў ад усіх атрыманых даходаў, за выключэннем субсідый.
Размова таксама ішла аб тым, каб удасканаліць сістэму аплаты працы ў клубах, вызначыўшы максімальныя памеры штомесячнага каманднага фонду аплаты працы ў залежнасці ад віду спорту за кошт субсідый, а таксама мінімальны і максімальны памер аплаты працы на аднаго спартсмена, трэнера або спецыялістаў з розных дзяржаўных крыніц. Для заахвочвання за рэзультаты па выніках чэмпіянатаў створаць агульнакамандны прызавы фонд.
Для клубаў, якія ўдзельнічаюць у КХЛ і іншых міжнародных спаборніцтвах, прапануецца вызначыць магчымасць фінансавання расходаў па ўдзеле ў такіх спаборніцтвах з перавышэннем норм і нарматываў па ўзгадненні з Прэзідыумам Савета Міністраў. Яшчэ адна прапанова - устанавіць магчымасць аказання падтрымкі клубам па негульнявых відах спорту ў адпаведнасці з парадкам, вызначаным Мінспорту па ўзгадненні з Прэзідыумам Савета Міністраў.
"Сродкі, якія паводле ўказа нумар 191 раней даваліся ў клубы, федэрацыі, сёння будуць (паступаць. - Заўвага БЕЛТА) у бюджэт. Гэта падаткі на зямлю, нерухомую маёмасць. А з бюджэту ў выглядзе субсідый будуць выдавацца на развіццё спорту. Але яны будуць кантралявацца, як і бюджэтныя сродкі. Будзе зразумела, куды кожная капейка траціцца. У тым ліку і спонсарскія сродкі, калі яны паступаюць ад дзяржаўных арганізацый і прадпрыемстваў", - расказаў журналістам Сяргей Кавальчук.
Ён прывёў прыклад, што цяпер па горадзе Мінску за кошт ільгот па падатку на нерухомую маёмасць і зямлю ўвогуле выходзіць 50 працэнтаў усіх сродкаў, якія атрымліваюць усе клубы ў краіне. Гэта звязана з падатковымі стаўкамі ў сталіцы і рэгіёнах. "Гэта значыць (у Мінску. - Заўвага БЕЛТА) у іх ужо першапачаткова ўмовы лепшыя", - канстатаваў міністр.
Тое ж самае датычыцца клубаў, спонсарам якіх з'яўляецца тое ці іншае буйное і стабільна працуючае прадпрыемства, якое можа дазволіць сабе траціць на спорт больш сродкаў, напрыклад "Беларуськалій". "Калі яны (клубы. - Заўвага БЕЛТА) атрымліваюць ад дзяржаўнага прадпрыемства сродкі, яны будуць атрымліваць па бюджэтных нормах, незалежна ад таго, што гэта за прадпрыемства, якое распараджаецца, умоўна кажучы, сваімі сродкамі. І тое ж самае датычыцца астатніх буйных прадпрыемстваў, якія ёсць у Беларусі. Яны будуць выдзяляць сродкі на развіццё відаў спорту раўнамерна, аднолькава па ўсёй краіне, усім клубам. Астатнія грошы (клубы. - Заўвага БЕЛТА) зарабляйце самі", - расказаў Сяргей Кавальчук аб новай плануемай схеме.
Паводле слоў міністра, з гэтым дысбалансам звязаны і некаторыя іншыя праблемныя пытанні ў беларускім спорце. Напрыклад, у футболе можа складвацца сітуацыя, калі максімальныя зарплаты ігракоў у адной рэгіянальнай камандзе могуць быць ніжэйшыя за мінімальныя ў іншай. У выніку бываюць выпадкі, калі таленавіты і перспектыўны футбаліст купляецца больш матэрыяльна забяспечанай камандай і садзіцца на лаўку запасных. "Ён не гуляе. Яго задавальняе. Яму заработную плату далі большую, чым ён мог бы атрымліваць максімальна (у сваёй былой камандзе. - Заўвага БЕЛТА). Ён не развіваецца, не расце. І вось гэта праблема рознага фінансавання і розных магчымасцей спонсараў і клубаў. Мы павінны сёння паглядзець на рэгіянальны спорт. У іх магчымасцей сёння менш", - заявіў Сяргей Кавальчук.
Пры гэтым ні пра якую ўраўнілаўку размова не ідзе. Маецца на ўвазе толькі стварэнне роўных базавых умоў, а ўсё астатняе - выключна за рэзультат. "Калі каманда (мы бяром гульнявыя віды спорту) паказвае рэзультат на міжнароднай арэне, яны фінансуюцца інакш. У іх ёсць магчымасць дафінансавання. У тым жа футболе яны атрымліваюць дадатковыя сродкі. У іх ужо ад рэзультату, з-за таго, што яны туды (на тыя ці іншыя міжнародныя спаборніцтвы. - Заўвага БЕЛТА) трапілі, фінансаванне лепшае, чым у клубаў, якія не трапляюць на гэтыя спаборніцтвы", - сказаў міністр.
Што датычыцца паспяховых выступленняў і перамог у дамашніх чэмпіянатах, то і тут клубы заўсёды атрымліваюць фінансавае заахвочванне з боку заснавальнікаў, на ўзроўні рэгіёнаў і гэтак далей. "Ніхто ў крыўдзе ў нас не застаецца. Я ведаю заработныя платы футбалістаў, хакеістаў, ва ўсіх відах спорту. Там, дзе ёсць рэзультат, дзяржава дастойна і якасна аплачвае работу спартсменаў", - падкрэсліў Сяргей Кавальчук.-0-
Падпісвайцеся на нас у
