23 ліпеня, Токіа /Кар. БЕЛТА/. На Нацыянальным стадыёне ў Токіа сёння адкрыюцца XXXII летнія Алімпійскія гульні. Пачатак урачыстай цырымоніі ў 14.00 па беларускім часе, паведамляе карэспандэнт БЕЛТА.
У сувязі з эпідэміялагічнай абстаноўкай на трыбунах арэны, якая ўмяшчае 80 тыс. гледачоў, на цырымоніі адкрыцця будуць прысутнічаць 950 чалавек. Усе яны - афіцыйныя асобы дэлегацый. Колькі спартсменаў пройдзе па дарожках стадыёна, пакуль невядома. У любым выпадку ў час парада атлетаў будуць прыняты розныя меры, накіраваныя на прадухіленне распаўсюджвання COVID-19. Так, напрыклад, спартсмены абавязаны вытрымліваць сацыяльную дыстанцыю і выкарыстоўваць медыцынскія маскі. Першай на арэну выйдзе зборная Грэцыі, а апошняй - Японіі. Потым атлеты, трэнеры і афіцыйныя асобы прымуць прысягу і Гульні аб'явяць адкрытымі. Па традыцыі праграма цырымоніі адкрыцця трымаецца ў строгім сакрэце. Аднак вядома, што афіцыйная назва праграмы - United by Emotion, або "Аб'яднаныя эмоцыямі".
Гульні ў Токіа павінны былі адбыцца ў мінулым годзе з 24 ліпеня па 9 жніўня. З-за каранавіруснай інфекцыі Алімпіяду перанеслі на 2021 год, цяпер яна пройдзе з 23 ліпеня па 8 жніўня. Замежныя балельшчыкі, згодна з рашэннем арганізатараў, на стадыёны дапускацца не будуць. Аналагічнае абмежаванне дзейнічае ў шасці японскіх прэфектурах для мясцовых гледачоў.
У спаборніцтвах прымуць удзел амаль 12,5 тыс. спартсменаў з больш як 200 краін. Будзе разыграна 339 камплектаў узнагарод у 33 відах спорту. У складзе беларускай каманды на алімпійскіх арэнах выступяць 108 атлетаў у 20 відах спорту. Беларусы сёмы раз выступяць на летніх Гульнях самастойнай камандай. За ўсю гісторыю выступленняў на летніх Алімпіядах беларускія спартсмены заваявалі 78 медалёў - 12 залатых, 27 сярэбраных і 39 бронзавых.
Беларускія аматары спорту змогуць убачыць прамую трансляцыю цырымоніі адкрыцця ў прамым эфіры тэлеканалаў "Беларусь 1" і "Беларусь 5".
З прычыны розніцы часавых поясаў Токіа і Мінска выступленні спартсменаў у рэжыме рэальнага часу будуць трансліравацца на тэлеканалах "Беларусь 2" і "Беларусь 5", а таксама на канале "Беларусь 5. Інтэрнэт" раніцай і днём - усяго запланавана 250 гадзін жывога вяшчання. У вячэрнім эфіры "Беларусь 5" арганізуе дадатковы паказ найбольш знакавых і яркіх спаборніцтваў у розных дысцыплінах.-0-
