08 ліпеня 2024, 12:32

Лета ў стылі рэтра: зоркі футбола Беларусі і Расіі сустрэліся ў матчы легенд

8 ліпеня, Мінск /Кар. БЕЛТА/. На Нацыянальным алімпійскім стадыёне "Дынама" адбыўся таварыскі матч легенд беларускага і расійскага футбола, паведамляе карэспандэнт БЕЛТА.

Паядынак праходзіў у рамках праекта Расійскага футбольнага саюза "Ліга Легенд". У папярэднія гады гледачы сталі сведкамі рэтра-гульняў паміж зоркамі "Спартака" і "Зеніта", легендамі "Лакаматыва" і ЦСКА, а сёння праект выйшаў на міжнародны ўзровень. Можна сказаць, што такая сустрэча стала своеасаблівай спробай рэваншу нашага футбола за паражэнне нацыянальнай каманды Беларусі ад зборнай Расіі з лікам 0:4 месяц таму.

Нядзельны паядынак быў прымеркаваны да 80-годдзя вызвалення Беларусі: раніцай перад гульнёй футбалісты і трэнеры абедзвюх каманд усклалі кветкі ў мемарыяльным комплексе "Хатынь", таксама для ўдзельнікаў сустрэчы была праведзена экскурсія. Непасрэдна перад выхадам ігракоў на поле расійская выканаўца Алена Север выступіла з кампазіцыяй "Вярніце памяць".

За гадзіну да гульні футбалісты правялі фота- і аўтограф-сесію. Найбольшую цікавасць у паклоннікаў футбола выклікалі зоркі з Расіі, у прыватнасці Андрэй Аршавін. Магчыма, менавіта працяглае падпісванне буклетаў і пазіраванне з фанатамі адабрала ў гасцей лішнюю энергію - у стартавыя мінуты паядынку больш актыўнымі на полі выглядалі беларусы.

Першую вылазку да чужых варот зрабіў Цімафей Калачоў, які выдатна адкрыўся пад далёкую перадачу партнёра, але не змог абысці капітана расіян Віктара Анопку. Першы акцэнтаваны ўдар у бок варот нанёс Максім Рамашчанка, але мяч праляцеў над перакладзінай. Лік быў адкрыты гаспадарамі на 17-й мінуце: з-за межаў штрафной дакладна ў дзявятку трапіў Станіслаў Драгун.

Адыграцца сапернік мог праз сем мінут, расіяне атрымалі права на перспектыўны штрафны, але Алан Дзагоеў прабіў побач са штангай. Крыху пазней здарыўся яшчэ больш небяспечны момант: гасцям нарэшце ўдалося расчарціць камбінацыю, якую замыкаў Юрый Жыркоў - мяч патрапіў у стойку варот і адскочыў назад у поле.

На старце другога тайма каманды абмяняліся галявымі шанцамі: прастрэл з фланга ледзь не замкнуў Аляксец Смерцін, а ўдар Максіма Жаўнерчыка ў скачку пацягнуў варатар гасцей Руслан Нігматулін. Услед пад выгукі трыбун "Андрэй, давай!" да мяча тройчы прыкладваўся Аршавін, але кожны раз галкіпер гаспадароў Аляксандр Суліма адводзіў пагрозу.

У хуткім часе беларусы ледзь не пакаралі саперніка за марнатраўнасць: сам-насам з варатаром аказаўся Вячаслаў Глеб, але Нігматулін зноў быў на вышыні. Пасля гэтага расіяне вярнулі мяч пад кантроль, і іх атакуючы парыў усё ж прынёс вынік. За 10 мінут за фінальнага свістка ў беларускія вароты быў назначаны 11-метровы, які ўдачна выканаў Андрэй Карака.

Асноўны час паядынку ў выніку скончыўся ўнічыю, і пераможца матчу вызначыўся ў серыі пенальці. Пасля пяці ўдараў кожны з бакоў нанёс па чатыры дакладныя ўдары, далей пачалася гульня да першага промаху. У наступным жа падыходзе расіянін Раман Шышкін рэалізаваў сваю спробу, а Цімафей Калачоў - не. У выніку 1:1 і 5:4 па пенальці, Расія выйграе матч легенд. Лепшым іграком у нашай каманды быў прызнаны Станіслаў Драгун, у саперніка - Віктар Анопка.

Пасля заканчэння матчу перад ігракамі і гледачамі выступіў рэпер Сярога, які выканаў свой культавы хіт "Чорны бумер". Першая частка рэтра-дыскатэкі нулявых на стадыёне "Дынама" адбылася за паўгадзіны да гульні, на газон са сваёй легендарнай кампазіцыяй "Усё будзе добра" выходзіў Міця Фамін, таксама трыбуны разаграваў Гарык Багамазаў.-0-