14 лютага, Пекін /Кар. БЕЛТА/. Трэнеры беларускай мужчынскай зборнай назвалі імёны біятланістаў, якія заўтра выступяць у эстафетнай гонцы Алімпійскіх гульняў, паведамілі карэспандэнту БЕЛТА ў прэс-службе НАК.
У складзе беларускай каманды на лыжню выйдуць Мікіта Лабастаў, Дзмітрый Лазоўскі, Максім Варабей і сярэбраны прызёр індывідуальнай гонкі Антон Смольскі. Беларусы атрымалі 5-ы нумар, а ўсяго ў эстафету заяўлена 21 каманда. Старт эстафетнай гонкі 4х7,5 км у біятлонным цэнтры ў Чжанцзякоу будзе дадзены заўтра апоўдні па мінскім часе.
У Пхёнчхане-2018 беларуская эстафетная каманда заняла 8-е месца. Тады ў складзе былі Антон Смольскі, Раман Ялётнаў, Уладзімір Чапелін і Сяргей Бачарнікаў. На дзвюх Алімпійскіх гульнях - у Лілехамеры-1994 і Нагана-1998 - беларуская каманда займала 4-е месца, гэта пакуль лепшы рэзультат у мужчынскіх эстафетах.
У жаночай эстафеце мінулай Алімпіяды беларускі Дар'я Домрачава, Надзея Скардзіна, Дзінара Алімбекава і Ірына Лешчанка (Крыўко) заваявалі залаты медаль.-0-