25 сакавіка, Мінск /Кар. БЕЛТА/. У сувязі з негатыўным развіццём эпідэміялагічнай сітуацыі з COVID-19 у свеце КХЛ прынята рашэнне аб адмене астатняй часткі сезона 2019/2020. Такая інфармацыя размешчана на афіцыйным сайце лігі, паведамляе БЕЛТА.
Рашэнне прынята пасля кансультацый з усімі зацікаўленымі бакамі і прадыктавана бяспекай здароўя ігракоў, балельшчыкаў, супрацоўнікаў клубаў і ўсіх, хто ўдзельнічае ў арганізацыі і правядзенні матчаў КХЛ.
"Лігай было распрацавана мноства сцэнарыяў далейшага развіцця падзей: ад дагульвання чэмпіянату ў тэрмін да 30 красавіка 2020 года да працягу яго ў чэрвені і ліпені. Аднак на гэты момант выкананне гэтых сцэнарыяў бачыцца малаверагодным, - гаворыцца ў паведамленні. - Некалькі клубаў былі вымушаны заявіць аб адмове ад далейшага ўдзелу ў плэй-оф. Акрамя таго, узніклі б складанасці з вяртаннем замежных ігракоў на тэрыторыю Расіі. Усё гэта пазбавіла б турнір спартыўнай прывабнасці. Правядзенне плэй-оф без каманд, якія заваявалі права змагацца за Кубак Гагарына, было б парушэннем спартыўнага прынцыпу".
Кіраўніцтва лігі лічыць, што працяг чэмпіянату ў летні перыяд вельмі негатыўна паўплываў бы на наступны сезоне. Пры такім сцэнарыі клубам неабходна поўнасцю мяняць прывычныя тэрміны летніх водпускаў і перадсезоннай падрыхтоўкі, а КХЛ вымушана была б зрушыць тэрміны трансферных вокнаў, пераносіць пачатак сезона на крытычна познюю дату, а таксама скарачаць колькасць гульняў у чэмпіянаце. Больш таго, 18 клубаў лігі ўжо завяршылі ўдзел у чэмпіянаце і пачалі планамерную падрыхтоўку да сезона 2020/2021.
Рашэнне аб размеркаванні месцаў па выніках чэмпіянату 2019/2020 будзе прынята на адным з бліжэйшых пасяджэнняў савета дырэктараў КХЛ. Таксама савет дырэктараў вызначыць склад удзельнікаў чэмпіянату 2020/2021, пасля чаго ліга пачне падрыхтоўку календара.-0-
