26 студзеня, Мінск /Кар. БЕЛТА/. Міністр спорту Сяргей Кавальчук выказаў упэўненасць у тым, што замежныя зборы футбольных клубаў не прыводзяць да паляпшэння вынікаў на міжнароднай арэне, паведамляе БЕЛТА са спасылкай на "СБ - Беларусь сегодня".
Міністр звярнуў увагу, што некалькі гадоў таму, адразу пасля яго ўступлення на пасаду, было праведзена сумеснае пасяджэнне з АБФФ. Адной з прычын няўдалай гульні беларускіх футбалістаў спецыялісты тады называлі адсутнасць у краіне ўмоў для падрыхтоўкі ў міжсезонне. "Было прынята рашэнне за два гады ва ўсіх абласных гарадах пабудаваць крытыя футбольныя манежы. Пастанавілі - зрабілі: у самы кароткі тэрмін узвялі сем аб'ектаў. Але тут жа знайшлася новая прычына: пакрыццё, аказалася, павінна быць не штучнае, а натуральнае! Аднак у манежаў поўная загрузка, дзеці і аматары гуляюць і радуюцца, каманды з іншых краін прыязджаюць і гавораць, што ўмовы шыкоўныя", - падкрэсліў Сяргей Кавальчук.
У мінулым годзе, нягледзячы на фармальную забарону Мінспорту на замежныя зборы, чатыры каманды Вышэйшай лігі ўсё ж адправіліся за мяжу - "Шахцёр", БАТЭ, "Рух" і "Тарпеда-БЕЛАЗ". "У салігарчан не атрымалася ўдала выступіць у еўракубках, БАТЭ таксама не паказаў добрага выніку. Затое "Гомель", які рыхтаваўся дома, заняў чацвёртае месца і стаў галоўным адкрыццём чэмпіянату. А каманда з Жодзіна пасля падрыхтоўкі ў Турцыі ўпала на восьмую пазіцыю, прапусціўшы наперад "Віцебск", які працаваў на родных палях. Вось і ўся карысць ад дарагіх замежных збораў, таму практыку затратных выездаў на курорты пара кардынальна мяняць", - перакананы міністр.
Сяргей Кавальчук таксама закрануў тэму фінансавання клубаў. Паводле яго слоў, каб атрымаць права на дзяржпадтрымку, кожная каманда абавязана ўзгадніць з Мінспортам план развіцця. "У ім павінна быць дакладна прапісана размеркаванне ўсіх сродкаў: бюджэт клуба, што ідзе на зарплаты, на зборы, на інфраструктуру. У адпаведнасці з указам нумар 191 не менш за 25 працэнтаў ад усіх сродкаў павінны выдзяляцца на развіццё дзіцяча-юнацкага футбола, - падкрэсліў міністр. - Каб зарабіць дадатковыя грошы і траціць іх па сваім жаданні, трэба годна выступаць на міжнароднай арэне, прабівацца ў групы еўракубкаў. Або гуляць так, каб балельшчыкі куплялі білеты і напаўнялі стадыёны. Але сёння там пуста, таму што наш футбол нікому не цікавы - няма на што глядзець. Будзе вынік - будзе і фінансаванне, але не наадварот", - сказаў на заканчэнне Сяргей Кавальчук.-0-
