26 студзеня, Магілёў /Кар. БЕЛТА/. Амаль 700 чалавек стануць удзельнікамі гарадской лыжні ў Бабруйску 27 студзеня. Аб гэтым карэспандэнту БЕЛТА расказаў начальнік аддзела спорту і турызму Бабруйскага гарвыканкама Аляксей Варанкоў.
Спартыўнае свята – ужо традыцыйнае для гараджан мерапрыемства. І як адзначыў Аляксей Варанкоў, кожны год удзельнікамі спаборніцтва становяцца сотні жыхароў Бабруйска: навучэнцы, работнікі прадпрыемстваў і арганізацый горада. Для іх падрыхтуюць дзве трасы, даўжынёй 1,2 км і 800 м.
Дыстанцыю 1,2 км пераадолеюць каманды органаў дзяржаўнага кіравання, каманды структурных падраздзяленняў гарвыканкама, адміністрацый раёнаў, праваахоўных органаў і сілавых структур, ГРАНС, Бабруйскай цэнтральнай бальніцы, зборныя ўстановы сярэдняй спецыяльнай і прафесійна-тэхнічнай адукацыі, калектывы фізічнай культуры і спорту, ветэраны і аматары лыжнага спорту.
Траса 800 м падрыхтавана для каманд устаноў агульнай сярэдняй адукацыі, падлеткавых клубаў устаноў дадатковай адукацыі дзяцей і моладзі.
Рэгістрацыя каманд-удзельніц стартуе ў 9.45. Урачыстае адкрыццё спаборніцтваў – у 11.00.
Усім удзельнікам неабходна мець пры сабе дакументы, заяўку на ўдзел устаноўленага ўзору і медыцынскую даведку аб стане здароўя.-0-
