24 кастрычніка, Мінск /Кар. БЕЛТА/. На пляцоўцы Рэспубліканскага дзяржаўнага вучылішча алімпійскага рэзерву стартаваў другі тур Маладзёжнай лігі Расіі па валейболе сярод мужчынскіх каманд, паведамляе карэспандэнт БЕЛТА.
Удзел у Маладзёжнай лізе прымаюць дубліруючыя склады каманд расійскай Суперлігі, фарм-клубам мінскага "Будаўніка", які выступае ў чэмпіянаце Расіі, з'яўляецца юніёрская зборная Беларусі. Першы тур МВЛ з удзелам беларусаў прайшоў у Маскве ў канцы верасня, у шасці матчах нашы юнакі атрымалі толькі адну перамогу (над краснаярскім "Енісеем-2").
Другі этап Маладзёжнай лігі беларуская зборная праводзіць на дамашняй пляцоўцы супраць каманд "СШАР Саматлор" (Ніжнявартаўск), "Нова" (Навакуйбышаўск) і "Нафтавік ВАР" (Арэнбург). Усе калектывы згуляюць паміж сабой па два разы. У стартавым матчы тура нашы хлопцы абыгралі равеснікаў з Арэнбурга - 3:0 (25:23, 25:18, 25:21). Наступны паядынак каманда Беларусі правядзе сёння, у саперніках - "СШАР Саматлор". Сустрэча стартуе ў 18.30.
Жаночая юніёрская зборная нашай краіны пачне сваё выступленне ў Маладзёжнай валейбольнай лізе 27 кастрычніка. Першы тур МВЛ сярод дзяўчат пройдзе ў Мінску, у госці да беларусак прыедуць "Туліца-2", "Ліпецк-2" і ніжагародская "Спарта-2".-0-
