5 сакавіка, Мінск /Кар. БЕЛТА/. У нямецкім Дзюсельдорфе прайшла жараб'ёўка матчу кваліфікацыі Кубка Дэвіса паміж тэнісістамі зборных Беларусі і Германіі, паведамляе карэспандэнт БЕЛТА.
У пятніцу, 6 сакавіка, першымі на хардавы корт арэны Castello выйдуць Ілья Івашка і Ян-Ленард Штруф. Следам за імі згуляюць Ягор Герасімаў і Філіп Кольшрайбер.
У другі дзень спаборніцтваў, 7 сакавіка, адбудуцца яшчэ два адзіночныя паядынкі: Ягор Герасімаў - Ян-Ленард Штруф, Ілья Івашка - Філіп Кольшрайбер. На парную сустрэчу новы капітан беларускай каманды Дзмітрый Жырмонт заявіў Андрэя Васілеўскага і Ягора Герасімава, яго нямецкі калега Міхаэль Кольман зрабіў стаўку на Кевіна Кравіца і Андрэаса Міса. У другі гульнявы дзень капітаны каманд маюць права правесці замены.
Мінулыя гады беларускія і нямецкія тэнісісты сустракаліся ў розыгрышы Кубка Дэвіса толькі аднойчы. У верасні 2003 года ў матчы плэй-оф сусветнай групы ў Германіі беларусы выйгралі з лікам 3:2. У камандным сусветным рэйтынгу зборная Беларусі займае 45-е месца, Германія знаходзіцца на 12-й пазіцыі.
У астатніх кваліфікацыйных матчах згуляюць: Аўстралія - Бразілія, Харватыя - Індыя, Славакія - Чэхія, Венгрыя - Бельгія, Італія - Рэспубліка Карэя, Аўстрыя - Уругвай, Калумбія - Аргенціна, Японія - Эквадор, ЗША - Узбекістан, Казахстан - Нідэрланды, Швецыя - Чылі.
Пераможцы гэтых гульняў атрымаюць пуцёўку ў фінальную стадыю розыгрышу Кубка Дэвіса, якая пройдзе 23-29 лістапада ў Мадрыдзе. Акрамя іх у іспанскай сталіцы выступяць гаспадары - тэнісісты Іспаніі і зборныя Вялікабрытаніі, Канады, Францыі, Сербіі і Расіі.-0-
