10 лістапада, Мінск /Кар. БЕЛТА/. Міжнародны хакейны турнір сярод юнацкіх зборных "Кубак Прэзідэнцкага спартыўнага клуба" пройдзе ў Мінску, паведамілі БЕЛТА ў прэс-службе арганізацыі.
Спаборніцтвы з 11 па 13 лістапада адбудуцца на вялікай пляцоўцы "Чыжоўка-Арэны". На гэты раз на мінскі лёд выйдуць каманды Беларусі, Казахстана і Расіі.
Юнацкая зборная Славакіі не змагла прыняць удзел у турніры з-за выяўленых выпадкаў COVID-19 сярод членаў каманды. Замест яе склад удзельнікаў папоўніла зборная каманда МТЗ - юніёрскай лігі, узмоцненая ігракамі Вышэйшай лігі адкрытага чэмпіянату Беларусі па хакеі з шайбай. Узначаліў каманду 2004/2005 г.н. Андрэй Рашчынскі.
Кубак Прэзідэнцкага спартыўнага клуба - першы міжнародны турнір па хакеі ў Беларусі, які праводзіцца на традыцыйнай аснове. Пераможцамі за гісторыю турніру станавіліся зборныя Расіі (9 разоў), Беларусі (3 разы) і Латвіі (1 раз). У свой час ён пачынаўся на крытым катку ў парку Горкага, а цяпер праходзіць на сучаснай арэне, якая прымала матчы чэмпіянату свету 2014 года.
Галоўны трэнер беларускай зборнай (U-17) Дзмітрый Шульга адносна падрыхтоўкі сваіх падапечных да турніру сказаў: "Міжнароднай практыкі ў нас цяпер вельмі мала, таму Кубак Прэзідэнцкага спартыўнага клуба дасць магчымасць нам паглядзець, дзе мы знаходзімся адносна зборнай Расіі і Казахстана ў баявых умовах. У вышэйшай лізе мы гуляем са старэйшымі, а тут сустрэнемся з равеснікамі, лепшымі ігракамі сваіх краін. Мы зразумеем, на якім мы ўзроўні, з якіх пазіцый стартуем адносна нашых канкурэнтаў. Я чакаю, што юнакі змогуць сябе паказаць. У нас цяпер не так шмат ігракоў, якія праяўляюць сябе ў атацы, і гэта выклікае некаторыя апасенні. Турнір пакажа, чаму ігракі навучыліся і з кім мы пойдзем далей. Гэта будзе накшталт кантрольнай работы. Мэты заўсёды самыя высокія. Няма сэнсу выходзіць на лёд, калі гэта не так. Але паглядзім, як мы будзем да яе рухацца".
Каманда Казахстана прымае ўдзел у турніры другі раз, прадстаўлена мацнейшымі ігракамі 2004 і 2005 гадоў нараджэння, якія былі адабраны па выніках выступленняў ва ўнутраным чэмпіянаце. Галоўны трэнер Сяргей Старыгін адзначыў: "Мы ўдзячны за запрашэнне на Кубак Прэзідэнцкага спартыўнага клуба. Для такога ўзросту гэта першы статусны турнір, дзе давядзецца пазмагацца з ігракамі з Беларусі і Расіі. Безумоўна, турнір пасадзейнічае павышэнню спартыўнага майстэрства для казахстанскіх хакеістаў і атрыманню спаборніцкага вопыту на міжнародным узроўні. Усім удзельнікам турніру жадаю спартыўнага духу і праяўлення сваіх лепшых гульнявых якасцей, а балельшчыкам - убачыць цікавыя і відовішчныя гульні".
Каманда Расіі 9 разоў станавілася ўладальніцай пераходнага Кубка. Галоўны трэнер зборнай (U-16) Павел Бавулін сказаў: "Турнір у Мінску для нас цікавы па многіх прычынах. Юнакі толькі сабраліся, для іх гэта будуць першыя афіцыйныя гульні ў складзе зборнай. У дадатак некаторыя каманды традыцыйна будуць на год старэйшыя за нас, з імі будзе вельмі складана, але цікава гуляць. Мы адштурхоўваемся ў першую чаргу ад сваёй гульні, але па ходу турніру будзем ужо глядзець і на тое, як гуляюць сапернікі. На гэтым этапе мы не ведаем слабых і моцных бакоў адзін аднаго. Можна сказаць, што на адрэзку да Новага года для нас гэта самы галоўны турнір - ён дасць агульнае разуменне таго, у якім напрамку працаваць далей".
Кубак Прэзідэнцкага спартыўнага клуба мае рэпутацыю аднаго з першых турніраў, дзе можна ўбачыць будучых хакейных зорак у майках сваіх зборных у матчах высокага ўзроўню. Тут заваяваў адзін са сваіх першых міжнародных трафеяў уладальнік Кубка Стэнлі Яўген Кузняцоў, дэманстраваў бамбардзірскія навыкі адзін з вядучых ігракоў зборнай Расіі і "Лакаматыва" (Яраслаўль) Максім Шалуноў, актыўна процідзейнічаў нападаючым сапернікам дзеючы алімпійскі чэмпіён і ўладальнік Кубка Гагарына Мікіта Несцераў, дэбютавалі ў майцы з гербам адны з найбольш перспектыўных беларускіх хакеістаў Уладзіслаў Калячонак, Аляксей Протас, капітан нацыянальнай зборнай Беларусі і ігрок клуба НХЛ "Нью-Джэрсі Дэвілз" Ягор Шаранговіч. Заявіў аб сабе лепшы бамбардзір зборнай Латвіі на дарослым чэмпіянаце свету 2018 года, цяпер ігрок "Сан-Хасэ Шаркс" Рудольф Балцэрс, дэманстравалі свае таленты маладыя славацкія абаронцы Крысціян Яраш і Марцін Фехервары, якія абараняюць колеры клубаў Нацыянальнай хакейнай лігі.
Беларускія балельшчыкі тут жа маглі бліжэй пазнаёміцца з талентамі Артура Гаўруса, Яўгена Лісаўца, Івана Кульбакова, Максіма Сушко, Івана Драздова, Уладзіміра Алістрава, Яўгена Аксенцюка, Аляксея Коласава і іншых перспектыўных беларускіх хакеістаў.
Матчы юнацкіх зборных заўсёды праходзяць у бескампраміснай барацьбе, дзе кіпяць эмоцыі і запал. Кожны ігрок стараецца праявіць сябе перад трэнерамі, спецыялістамі, балельшчыкамі і роднымі, але і работа на карысць каманды застаецца ў прыярытэце. Знайсці патрэбны баланс у камандзе юных і амбіцыйных ігракоў - няпростая работа для трэнераў каманд. Усё гэта будзе цікавым відовішчам на лёдзе "Чыжоўка-Арэны". Уваход на матчы - свабодны.
Усе паядынкі турніру будуць трансліравацца ў прамым эфіры на Youtube-канале Прэзідэнцкага спартыўнага клуба з каментарыямі хакейных спецыялістаў, а таксама на тэлеканале "Беларусь 5".
Арганізатарамі турніру па хакеі з шайбай сярод юніёрскіх зборных каманд "Кубак Прэзідэнцкага спартыўнага клуба" выступаюць дзяржаўна-грамадскае аб'яднанне "Прэзідэнцкі спартыўны клуб", Міністэрства спорту і турызму, культурна-спартыўная ўстанова "Чыжоўка-Арэна", Мінскі гарадскі выканаўчы камітэт, Федэрацыя хакея Беларусі.
Расклад турніру:
11 лістапада
зборная каманда МТЗ юніёрскай лігі - Расія - 13.00,
Беларусь - Казахстан - 17.00;
12 лістапада
Расія - Казахстан - 13.00,
зборная каманда МТЗ юніёрскай лігі - Беларусь - 17.00;
13 лістапада
Казахстан - зборная каманда МТЗ - юніёрскай лігі - 11.00,
Беларусь - Расія - 14.30.-0-
