12 сакавіка, Мінск /Кар. БЕЛТА/. Хакейная каманда Прэзідэнта Беларусі атрымала шостую перамогу ў матчах XV Рэспубліканскіх спаборніцтваў сярод аматараў на прызы Прэзідэнцкага спартыўнага клуба, перадае карэспандэнт БЕЛТА.
Сёння на лёдзе сталічнай "Алімпік-Арэны" прэзідэнцкая каманда абыграла гасцей з Віцебскай вобласці з лікам 10:3 (4:0, 5:1, 1:2).
Гаспадары з першых секунд пайшлі наперад, абваліўшы шквал атак на вароты сапернікаў. Прайшло роўна тры мінуты і лік быў ужо 2:0 - спачатку вызначыўся Міхаіл Грабоўскі, а потым яго пачын падтрымаў Павел Волчак. Пры абодвух узяццях варот асістэнтам быў лепшы бамбардзір турніру Арцём Антоненка. Хутка чарговую атаку гаспадароў дакладным далёкім кідком завяршыў Аляксандр Лукашэнка, а затым Арцём Каркоцкі закінуў чацвёртую шайбу ў вароты віцябчан.
У пачатку другога перыяду госці актывізаваліся і Ігар Варашылаў адыграў адзін гол. Пасля гэтага віцебскім хакеістам давялося толькі абараняцца і яны прапусцілі пяць шайбаў запар. Галы ў свой актыў запісалі Арцём Антоненка, Яраслаў Чупрыс, Алег Антоненка, сваю другую шайбу закінуў Аляксандр Лукашэнка, а незадоўга да перапынку Міхаіл Грабоўскі эфектным кідком таксама аформіў галявы дубль. Гэты гол стаў самым прыгожым у матчы: знаходзячыся за варотамі, Міхаіл Грабоўскі перакінуў шайбу праз галкіпера і злёту адправіў яе ў цэль.
У заключнай трэці сустрэчы ў пераможцаў вызначыўся Алег Антоненка, а сапернікі адказалі галамі Ігара Варашылава і Рамана Раманенкі.
Лепшымі ігракамі сённяшняй сустрэчы прызнаны Ігар Варашылаў і Сяргей Шыткоўскі. Прызы ім уручыў старшыня Федэрацыі хакея Беларусі Аляксандр Багдановіч. Па ўжо даўно існуючай традыцыі не засталіся без падарункаў і балельшчыкі, якія адразу пасля заканчэння сустрэчы атрымалі дзясяткі цацак ад ігракоў каманды Прэзідэнта. Акрамя таго, у перапынках матчу самыя актыўныя фанаты проста на лёдзе прынялі ўдзел у разнастайных конкурсах, пераможцы якіх сталі ўладальнікамі прызоў ад Прэзідэнцкага спартыўнага клуба.
На старце турніру каманда Прэзідэнта перамагла хакеістаў Брэсцкай вобласці з вынікам 7:3, затым абыграла зборную Мінскай вобласці - 5:2, потым была мацнейшай за каманду Гомельскай вобласці - 8:2, затым выйграла ў сапернікаў з Магілёўскай - 12:4 і Гродзенскай вобласці - 8:3. У шасці паядынках першага этапу лядовая дружына кіраўніка дзяржавы набрала 12 ачкоў і заняла першае месца. У паўфінале лідары сустрэнуцца з хакеістамі Гомельскай вобласці. Другую паўфінальную пару склалі каманды Брэсцкай і Мінскай абласцей.
Цяпер бамбардзірскую гонку ўзначальвае форвард прэзідэнцкай каманды Арцём Антоненка, які набраў 19 ачкоў (8 шайбаў і 11 перадач).
Хакейная каманда Прэзідэнта 12 разоў выйгравала спаборніцтвы сярод аматарскіх каманд, па адным тытуле ў хакеістаў Гомельскай і Мінскай абласцей.
Арганізатары XV Рэспубліканскіх спаборніцтваў па хакеі сярод аматараў - Прэзідэнцкі спартыўны клуб, Міністэрства спорту і турызму, Мінскі гарадскі выканаўчы камітэт.-0-
