26 верасня, Мінск /Кар. БЕЛТА/. Хакеісты сталічнага "Дынама" сёння правядуць другі матч выязной серыі ў рамках рэгулярнага чэмпіянату КХЛ. У саперніках - магнітагорскі "Металург", паведамляе карэспандэнт БЕЛТА.
Каманда з Магнітагорска набірае ачкі ў дзевяці матчах запар, прайграўшы ў асноўны час толькі адзін раз са старту сезона. Дзякуючы гэтаму падапечныя Ільі Вараб'ёва ўзначальваюць Усходнюю канферэнцыю КХЛ, маючы 16 балаў пасля 10 сустрэч. У актыве мінчан - 14 ачкоў і бягучае 5-е месца на Захадзе. У першай гульні выязнога турнэ "зубры" па булітах уступілі ўфімскаму "Салавату Юлаеву" (2:3), "Металург" жа пачаў дамашнюю серыю з буйной перамогі над "Куньлунем" (4:0). Лепшым бамбардзірам у складзе мінчан з'яўляецца форвард Раян Спунер, на рахунку якога 9 (6+3) ачкоў, у лідара "сталявараў" Філіпа Мае на два рэзультатыўныя балы менш.
У мінулым сезоне КХЛ каманды правялі паміж сабой два паядынкі. На сваім лёдзе падапечныя Вудкрафта былі мацнейшымі з лікам 1:0, матч у Магнітагорску завяршыўся перамогай гаспадароў - 5:4, прычым па ходзе гульні "зубры" ўпусцілі лідарства ў чатыры шайбы. Чарговая сустрэча "Дынама" і "Металурга" стартуе ў 17.00.-0-
