9 лютага, Мінск /Кар. БЕЛТА/. Хакеісты мінскага "Дынама" пачынаюць заключную выязную серыю ў бягучым рэгулярным чэмпіянаце Кантынентальнай хакейнай лігі, паведамляе карэспандэнт БЕЛТА.
Першым сапернікам "зуброў" у гасцявым турнэ стане чэлябінскі "Трактар", абедзве каманды прадаўжаюць весці барацьбу за выхад у плэй-оф ад сваіх канферэнцый. За сем матчаў да завяршэння "рэгуляркі" мінчане з 63 баламі размяшчаюцца на сёмым месцы ў Заходняй канферэнцыі КХЛ, маючы адрыў пяць ачкоў ад дзявятага радка, які не праходзіць. У "Трактара" сітуацыя крыху горшая: клуб з Чэлябінска з 61 балам ідзе на Усходзе дзясятым, адстаючы ад васьмёркі лепшых на тры ачкі.
На завяршальным адрэзку сезона каманды паказваюць падобныя вынікі: і мінчане, і чэлябінцы атрымалі па чатыры перамогі ў сямі апошніх матчах. Па ходзе цяперашняга чэмпіянату "Дынама" і "Трактар" яшчэ не гулялі паміж сабой, але чатыры папярэднія сустрэчы каманд у КХЛ завяршыліся на карысць беларускага клуба. Першы за 14 месяцаў вочны паядынак "зуброў" і "мядзведзяў" стартуе ў 17.00.-0-
