23 снежня, Мінск /Кар. БЕЛТА/. Хакеісты мінскага "Дынама" ўступілі ўфімскаму "Салавату Юлаеву" ў матчы чэмпіянату КХЛ. Гульня ў сталіцы Башкортастана завяршылася не на карысць падапечных Крэйга Вудкрафта з лікам 3:8 (0:0, 1:3, 2:6), паведамляе карэспандэнт БЕЛТА.
Калі ў першым перыядзе, нягледзячы на ўзаемаатакуючы хакей у выкананні ігракоў дзвюх каманд, шайбы закінута не было, то пасля першага перапынку каманды парадавалі аматараў хакея чатырма ўзяццямі варот. Мінчане змаглі адкрыць рахунак. На 21-й мінуце вызначыўся Раман Гарбуноў, які выйшаў сам-насам з варатаром "Салавата" пасля выдатнага паса Сцяпана Фалькоўскага. Гэта шайба заахвоціла гаспадароў пляцоўкі, якія асадзілі вароты Дэні Тэйлара.
Вартавы варот мінчан некалькі разоў выручыў сваю каманду, аднак на 24-й мінуце Cакары Манінен пасля перадач Аляксандра Кадзейкіна і Філіпа Ларсена зраўнаваў лік. Прайшло яшчэ менш за мінуту сустрэчы - і навабранец "Салавата Юлаева", ігрок зборнай Беларусі Джэф Плат вывеў сваю новую каманду наперад. Лічбы на табло не астудзілі атакуючы запал уфімцаў, якія закінулі і трэці раз дзякуючы майстэрству Маркуса Гранлунда (33-я мінута).
Перапынак не пайшоў на карысць "зубрам", якія ў трэцім перыядзе з інтэрвалам менш чым дзве мінуты прапусцілі яшчэ тройчы. Умацавалі перавагу сваёй дружыны над "Дынама" Міхаіл Навуменка, Сакары Манінен і Арцём Піменаў. Госці не змірыліся з паражэннем і пастараліся змяніць ход матчу. Брэндан Казун на 48-й мінуце скараціў лік матчу. Затым Уладзімір Алістраў закінуў сваю першую шайбу ў КХЛ, аформіўшы трэцяе ўзяцце варот "Салавата". Аднак гэта шайба не стала апошняй. Хакеісты "Салавата" Уладзімір Жаркоў і Эдуард Гіматаў з блізкай адлегласці прымусілі капітуляваць Дэні Тэйлара яшчэ двойчы, усталяваўшы канчатковы лік сустрэчы.-0-
