23 снежня, Мінск /Кар. БЕЛТА/. Хакеісты мінскага "Дынама" ўступілі "Ёкерыту" ў гасцявым матчы чэмпіянату КХЛ. Матч завяршыўся ў авертайме з лікам 1:2 (1:1, 0:0, 0:0, 0:1) не на карысць падапечных Крэйга Вудкрафта, паведамляе карэспандэнт БЕЛТА.
"Зубры" першымі адкрылі лік. На трэцяй мінуце матчу вызначыўся Дзяніс Масалёў. Затым ініцыятыву перахапілі гаспадары лёду. І калі спачатку іх атакі мелі крыху акадэмічны характар, то бліжэй да экватара стартавай трэці паядынку фінам удалося зраўнаваць лік. На 9-й мінуце старанні партнёраў меткім кідком завяршыў чэшскі легіянер "джокераў" Давід Скленічка.
У другім перыядзе "Ёкерыт" пачаў націск на абарону "Дынама". Небяспечныя моманты каля варот беларускага клуба пачалі ўзнікаць адзін за адным. Аднак ігракам "Ёкерыта" не хапала дакладнасці на завяршальнай стадыі атак. Акрамя таго, выдатна гуляў Аляксей Коласаў, як у выпадку з кідкамі Ііра Пакарынена і Джордана Шрэдэра. Ды і каркас варот быў не супраць дапамагчы мінчанам.
Трэці перыяд пачаўся з атак "зуброў". Гаспадары адказвалі, але бяспечна. Праўда, на 45-й мінуце мінчане апынуліся ў меншасці. Маціяса Тэдэнбю выдалілі за затрымку саперніка клюшкай.
"Джокеры" арганізавалі некалькі атак, але зноў Аляксей Коласаў быў на вышыні. Бліжэй да канца перыяду ігракі "Ёкерыта" яшчэ больш узмацнілі націск. Беларуская каманда адказвала контратакамі. У выніку гульня перайшла ў авертайм. У дадатковы час фінская каманда змагла дабіцца свайго. Вызначыўся Кале Касіла, які прынёс перамогу "Ёкерыту".-0-
