8 снежня, Мінск /Кар. БЕЛТА/. Хакейнае мінскае "Дынама" сёння правядзе другі паядынак у бягучай дамашняй серыі ў рэгулярным чэмпіянаце Кантынентальнай хакейнай лігі, паведамляе карэспандэнт БЕЛТА.
Сапернікам падапечных Вудкрафта стане самая дамінуючая каманда гэтага сезона - СКА. Хакеісты з Санкт-Пецярбурга з 67 ачкамі ўзначальваюць табліцу Заходняй канферэнцыі, у бліжэйшых праследавацеляў з "Лакаматыва" на 13 балаў менш. Каманда пад кіраўніцтвам Рамана Ратэнберга не ведае паражэнняў ужо пяць матчаў запар, "зубры" ж гуляюць у снежні з пераменным поспехам. Дынамаўцы ўступілі канкурэнтам за месца ў плэй-оф "Спартаку" (1:2) і "Поўначсталі" (3:4), а таксама мінімальна перайгралі аўтсайдара лігі "Сочы" (2:1). На гэты момант мінчане ідуць на Захадзе сёмымі, маючы ў актыве 42 балы.
У бягучым сезоне каманды правялі паміж сабой ужо тры гульні, у кожнай з якіх перамагалі пецярбуржцы, прычым двойчы з вялікім лікам (5:1, 3:2, 7:2). Хакеісты з берагоў Нявы не даюць "Дынама" абыграць сябе ўжо дзесяць матчаў запар, апошняя перамога беларускага клуба над СКА датавана сакавіком мінулага года. Чарговае процістаянне "зуброў" і "армейцаў" стартуе на "Мінск-Арэне" у 19.10.-0-
