1 снежня, Мінск /Кар. БЕЛТА/. Хакейнае мінскае "Дынама" пацярпела гасцявое паражэнне ў рэгулярным чэмпіянаце Кантынентальнай хакейнай лігі, паведамляе карэспандэнт БЕЛТА.
У другім матчы выязной серыі "зубры" сустракаліся з маскоўскім "Спартаком". Асноўны час паядынку завяршыўся з лікам 1:1 - на шайбу дынамаўца Ніка Мерклі ў сярэдзіне стартавай трэці адказаў форвард гаспадароў Андрэй Лакціёнаў у заключнай 20-мінутцы. У авертайме выявіць пераможцу каманды таксама не змаглі, а серыя пасляматчавых кідкоў лепш удалася ігракам маскоўскага клуба. Фінальны лік - 1:2 не на карысць "Дынама".
Такім чынам, падапечныя Крэйга Вудкрафта ўпусцілі магчымасць дагнаць "Спартак" у турнірнай табліцы Захаду. Мінчане з 40 ачкамі засталіся на 7-м месцы канферэнцыі, у масквічоў ужо 43 балы і 6-я пазіцыя. Наступны матч у КХЛ "зубры" правядуць 2 снежня супраць горшай каманды КХЛ "Сочы" - гэтай гульнёй "Дынама" завершыць гасцявое турнэ.-0-
