5 студзеня, Мінск /Кар. БЕЛТА/. Хакейнае мінскае "Дынама" атрымала другую перамогу запар у рэгулярным чэмпіянаце Кантынентальнай хакейнай лігі, паведамляе карэспандэнт БЕЛТА.
У другім матчы выязной серыі дынамаўцы сустракаліся з 6-й камандай Усходняй канферэнцыі КХЛ - "Адміралам" з Уладзівастока. Хакеісты даволі доўга абыходзіліся без узяццяў варот: першую шайбу гледачы на "Фяцісаў-Арэне" ўбачылі толькі ў канцоўцы другога перыяду, калі вызначыўся нападаючы "зуброў" Нік Мерклі. Лідарства гасцей доўжылася нядоўга: далёкаўсходнікі зраўнавалі лічбы хутка пасля пачатку фінальнай трэці. Але за сем мінут да фінальнай сірэны малады форвард мінчан Вадзім Мароз зноў вывеў "Дынама" наперад, і на гэты раз адказу ў "Адмірала" не знайшлося. У выніку 2:1 на карысць беларускага клуба.
Гэта перамога стала для падапечных Крэйга Вудкрафта другой запар пасля серыі з васьмі паражэнняў. Дзякуючы гэтаму наша каманда вярнулася на 8-е месца Заходняй канферэнцыі, але ў чарапавецкай "Поўначсталі", якая мае такую ж колькасць ачкоў (47), ёсць два матчы ў запасе. Апошні паядынак у рамках бягучага гасцявога турнэ "зубры" правядуць у суботу, 7 студзеня, супраць новасібірскай "Сібіры". Сустрэча стартуе ў 13.30 па беларускім часе.-0-
