6 лютага, Мінск /Кар. БЕЛТА/. На пляцоўцы веладрома ШКСК "Мінск-Арэна" завяршыўся заключны тур чэмпіянату краіны па індорхакеі сярод мужчынскіх каманд, паведамілі БЕЛТА ў прэс-службе БФХТ.
Па выніках папярэдняга тура чэмпіянату ў чацвёрку лепшых прабіліся першая і другая каманды хакейнага клуба "Мінск", а таксама ХК "Гомель" і брэсцкі "Будаўнік". У першым матчы адной другой фіналу ХК "Мінск-1" разграміў гамяльчан з лікам 11:3, наступны паўфінал паміж "Будаўніком" і "Мінскам-2" закончыўся ўнічыю, але ў серыі булітаў мацнейшым быў сталічны калектыў.
Серыі за першае і трэцяе месца турніру праводзіліся да дзвюх перамог. У "бронзавым" процістаянні "Будаўнік" двойчы перамог "Гомель" - 8:5 і 12:4, а ў серыі за чэмпіёнства "Мінск-1" абодва разы абыграў прадстаўнікоў сваёй другой каманды - 6:4 і 9:5. Лепшым бамбардзірам чэмпіянату стаў Уладзіслаў Белавусаў (ХК "Мінск-1"), лепшым варатаром быў прызнаны Арцём Вігель (ХК "Мінск-2"), звання самага каштоўнага іграка быў удастоены Павел Корсік (ХК "Мінск-2").
Акрамя таго, у рамках заключнага тура нацыянальнага першынства былі згуляны матчы за 5-8 месцы турніру. У выніку на пятай пазіцыі фінішавала зборная Мінскай вобласці, СДЮШАР ХК "Мінск"-РЦАП - на шостым месцы, "Гроднааблспорт" - сёмы, замкнула табліцу чэмпіянату СДЮШАР "Брэстжылбуд".-0-
