1 красавіка, Мінск /Кар. БЕЛТА/. Хакеісты мінскага "Юнацтва" былі мацнейшымі за салігорскі "Шахцёр" і ў авертайме выйгралі трэці паядынак фінальнай серыі чэмпіянату Беларусі - 2:1 (1:0, 0:1, 0:0, 1:0). Цяпер лік у серыі да чатырох перамог стаў 2:1 на карысць мінчан, паведамляе карэспандэнт БЕЛТА.
Першы перыяд прайшоў з перавагай "гарнякоў", якія скарысталіся ёй, адкрыўшы лік на 19-й мінуце сустрэчы. Раман Крыкуненка і Ілья Камбовіч вывелі на ўдарную пазіцыю Рамана Дастанку, які не прамахнуўся. "Юнацтва" ў сваю чаргу прыклала намаганні, каб адыграцца, удалося гэта толькі ў другім перыядзе. Міхаіл Стэфановіч пасля перадач Данііла Бокуна і Івана Драздова перайграў Максіма Малюціна, калі мінчане гулялі ў большасці.
У трэцім перыядзе каманды дзейнічалі з аглядкай на ўласныя вароты. Вострыя атакі ўзнікалі то каля адных, то каля другіх варот, але галкіперы абедзвюх дружын дзейнічалі беспамылкова. На 54-й мінуце сустрэчы мінчанін Іван Драздоў не змог рэалізаваць буліт. Апошнія мінуты асноўнага часу матчу таксама прайшлі ў атаках шматразовых чэмпіёнаў Беларусі, аднак дабіліся яны свайго ўжо ў авертайме. Міхаіл Стэфановіч у дадатковы час аформіў дубль з падачы Івана Драздова.
Два матчы серыі за залатыя медалі і Кубак Прэзідэнта прайшлі на лёдзе сталічнай "Чыжоўка-Арэны" і прынеслі кожнай камандзе па перамозе. Спачатку шматразовыя чэмпіёны Беларусі перамаглі "гарнякоў" з лікам 5:1, а ў другім паядынку "Шахцёру" ўдалося ўзяць рэванш (3:2). Наступны матч фінальнай серыі пройдзе ў Салігорску 1 красавіка. Потым, калі спатрэбіцца, паядынкі будуць праходзіць па чарзе на пляцоўках абодвух клубаў да чатырох перамог адной з каманд.
Чацвёртая гульня фінальнай серыі Кубка Прэзідэнта паміж "Шахцёрам" і "Юнацтвам" пачнецца ў 19.30. Прамую трансляцыю матчу можна будзе паглядзець на тэлеканале "Беларусь 5".
Хакеісты "Юнацтва" з'яўляюцца васьміразовымі чэмпіёнамі краіны, а іх сапернікі ўсяго адзін раз станавіліся ўладальнікамі золата. У рашаючых серыях за чэмпіёнскі тытул "Юнацтва" і "Шахцёр" сустракаліся тройчы: мінчане перамагалі два разы ў 2010 (4:3) і 2016 гадах (4:1), а ў 2015 годзе салігорскія хакеісты выйгралі залатую серыю з сухім лікам 4:0.
Па выніках рэгулярнага чэмпіянату гэтага сезона "Юнацтва" ўпэўнена заняло першае месца, а "Шахцёр" фінішаваў трэцім, прапусціўшы наперад гродзенскі "Нёман".-0-
