12 студзеня, Мінск /Кар. БЕЛТА/. Трыма матчамі ў Мінску, Магілёве і Жлобіне ў чацвер прадоўжыўся рэгулярны чэмпіянат беларускай хакейнай экстралігі, паведамляе карэспандэнт БЕЛТА.
Каляндар чэмпіянату падарыў у гэты дзень адразу два вочныя матчы з удзелам каманд з топ-6 турнірнай табліцы: "Юнацтва" прымала "Гомель", а "Віцебск" дома сустракаўся з "Металургам". Асабліва багатым на падзеі выдаўся паядынак на "Чыжоўка-Арэне", дзе сапернікі паразілі ўжо вароты адзін аднаго па два разы ў першым перыядзе. Далей сталічныя хакеісты дзякуючы дублю Сяргея Дразда пайшлі ў двухразовы адрыў, але ў сярэдзіне трэцяй 20-мінуткі госці лічбы зраўнавалі - 4:4. За тры мінуты да заканчэння перыяду Станіслаў Кучкін, здавалася, выйграў гэты матч для "Юнацтва", аднак усяго за шэсць секунд да фінальнай сірэны выратавальнікам "Гомеля" стаў Уладзіслаў Каткоў. Аднаго ачка натхнёным ігракам паўднёвай каманды аказалася мала, і ў авертайме Герман Несцераў прынёс "рысям" перамогу з лікам 6:5 - гэты поспех стаў для падапечных Сяргея Стася сёмым запар.
Паралельна ў Жлобіне "Віцебск", які ідзе ў экстралізе другім, раптоўна не змог нічога проціпаставіць мясцоваму "Металургу". Дзеючыя чэмпіёны краіны вызначыліся двойчы ў першым перыядзе і яшчэ раз у другім, а галкіпер "стальных ваўкоў" Сяргей Бальшакоў аформіў шатаўт. Рэзультат гульні - 3:0.
Яшчэ больш нечаканы рэзультат быў зафіксаваны ў Магілёве, дзе мясцовы клуб, які замыкае турнірную табліцу, разабраўся з чацвёртай камандай сезона "Нёманам". Пасля сарака мінут матчу "львы" мелі адрыў тры галы, у трэцім перыядзе гродзенцам удалося скараціць адставанне да мінімуму, але замест авертайму госці атрымалі шайбу ў пустыя вароты. У канчатковым выніку 4:2 - "Магілёў" спыняе серыю з шасці паражэнняў запар.-0-
