2 лютага, Мінск /Кар. БЕЛТА/. Бабруйскі клуб "Дынама-Шыннік" атрымаў другую запар дамашнюю перамогу ў рэгулярным чэмпіянаце Маладзёжнай хакейнай лігі, паведамляе карэспандэнт БЕЛТА.
У сераду падапечныя Андрэя Міхалёва прымалі на "Бабруйск-Арэне" чарапавецкі "Алмаз". Папярэдні паядынак каманд, які адбыўся 23 студзеня, завяршыўся разгромным паражэннем нашай каманды (1:8). Матч-рэванш прайшоў для "шыннікаў" па процілеглым сцэнарыі. Ужо ў стартавай трэці юныя дынамаўцы адправілі ў чужыя вароты чатыры шайбы, а ў другім перыядзе дадалі да перавагі яшчэ тры галы. Заключная 20-мінутка засталася за гасцямі, але на зыход процістаяння гэта не паўплывала. У выніку пераканаўчая вікторыя "Дынама-Шынніка" з лікам 8:4, дублямі ў складзе бабруйчан вызначыліся Мацвей Шыдлоўскі і Іван Аношка, па шайбе закінулі Мацвей Ладуцька, Данііл Крыштофік, Ягор Борыкаў і Канстанцін Валочка.
За сем матчаў да заканчэння рэгулярнага чэмпіянату МХЛ беларуская каманда з 60 ачкамі займае 3-е месца ў "Сярэбраным" дывізіёне Захаду і агульную 7-ю пазіцыю ў зводнай табліцы канферэнцыі. Наступны паядынак хакеісты "Дынама-Шынніка" правядуць 5 лютага ў гасцях у маскоўскіх "Крылаў Саветаў" - гэта гульня стане для "баброў" заключнай выязной перад шасціматчавай дамашняй серыяй.-0-
