11 кастрычніка, Мінск /Кар. БЕЛТА/. Хакеісты бабруйскага "Дынама-Шынніка" ў гасцях абыгралі "СКА-Варагаў" у чарговым матчы рэгулярнага чэмпіянату МХЛ, паведамляе карэспандэнт БЕЛТА.
Першыя шайбы гледачы на арэне ў Санкт-Пецярбургу ўбачылі ў другім перыядзе: з розніцай у мінуту ў чужыя вароты трапілі ігракі бабруйскай каманды Аляксандр Мурамцаў і Ягор Борыкаў. Аднак утрымаць перавагу "шыннікі" не змаглі, асноўны час гульні скончыўся з лікам 2:2. Вынік паядынку вырашыўся ў авертайме, дзе перамогу дынамаўцам прынёс Данііл Сацішвілі. Гэта сустрэча стала для каманд ужо трэцяй у бягучым сезоне, абодва папярэднія матчы таксама завяршыліся на карысць беларусаў (5:4, 3:2).
Такім чынам, на гэты момант "Дынама-Шыннік" з 12 баламі знаходзіцца на 13-м месцы ў Заходняй канферэнцыі МХЛ, адстаючы ад зоны плэй-оф на 3 ачкі. Заўтра бабруйчане правядуць паўторны паядынак супраць "СКА-Варагаў", старт матчу будзе дадзены ў 13.00.-0-
