29 снежня, Мінск /Кар. БЕЛТА/. У Магілёве вызначыліся фіналісты 26-га баскетбольнага Кубка Беларусі сярод мужчын, паведамляе карэспандэнт БЕЛТА.
У першай паўфінальнай гульні на паркеце спарткомплексу "Алімпіец" баскетбалісты "Гродна-93" у напружанай барацьбе адолелі віцебскі "Рубон" з перавагай усяго чатыры балы - 76:72. У другім паўфінале дзеючы ўладальнік Кубка "МІНСК" перамог магілёўскі "Барысфен" з лікам 82:62.
Такім чынам, сёння баскетбалісты "Гродна-93" і "МІНСК" сустрэнуцца ў вырашальным паядынку за галоўны трафей, а "Рубон" і "Барысфен" пазмагаюцца за бронзавыя ўзнагароды.
У фінальным матчы мінулага сезона "МІНСК" разграміў "Гродна-93" з розніцай 32 ачкі - 81:49 і 13-ы раз заваяваў Кубак. У паядынку за трэцяе месца "Барысфен" быў мацнейшым за "Рубон" - 87:66.
Нядаўна ў фінале жаночага кубкавага турніру баскетбалісткі "Гарызонта", якія прадстаўляюць Мінскую вобласць, адолелі гродзенскую "Алімпію" з перавагай толькі два балы - 74:72. У гульні за бронзу БК "МІНСК" узяў верх над "Гомельскімі рысямі" - 90:62.-0-
