10 снежня, Брэст /Кар. БЕЛТА/. У Брэсце летам 2022 года плануюць правесці міжнародны забег Bison Race, паведаміла карэспандэнту БЕЛТА начальнік аддзела спорту і турызму гарвыканкама Алеся Округ.
Такую гонку ў абласным цэнтры маюць намер правесці ўпершыню. Яна запланавана на 10 ліпеня. Стартавы і фінішны гарадок будзе знаходзіцца побач з паркоўкай каля "Зоркі" - галоўнага ўвахода ў мемарыяльны комплекс "Брэсцкая крэпасць-герой". Траса будзе пракладзена ўздоўж ракі Мухавец. Частка маршруту будзе праходзіць па экалагічнай сцежцы, астатняя дыстанцыя - па гарадской набярэжнай.
Удзельнікам прапануюць пераадолець больш за 5 км. На дыстанцыі бегуноў будзе чакаць звыш 20 перашкод рознай складанасці. У гонцы змогуць прыняць удзел прафесійныя спартсмены і аматары бегу. Арганізуюць і дзіцячую трасу працягласцю ад 1 км да 2 км.
"Bison Race ў Беларусі праводзяць з 2015 года. У асноўным гонка праводзіцца на закрытай тэрыторыі. Мы прапанавалі арганізатарам пракласці маршрут па набярэжнай, каб за спаборніцтвамі маглі паназіраць гледачы. Арыенціровачна чакаецца каля 1,5 тыс. удзельнікаў, - расказала Алеся Округ. - Брэст з-за пандэміі засумаваў па вялікіх спартыўных мерапрыемствах. Гонка ж пройдзе летам, на свежым паветры". Начальнік аддзела спорту і турызму дадала, што спартгарадок спецыяльна наблізяць да Брэсцкай крэпасці. Гэта ўжо становіцца гарадской традыцыяй: многіх атлетаў вабіць магчымасць стартаваць на фоне знакавай выдатнай мясціны.
Рэгістрацыя для ўдзелу павінна пачацца 10 снежня 2021 года.-0-