14 лютага, Пекін /Кар. БЕЛТА/. Сярэбраная прызёрка Гульняў у Пекіне ў лыжнай акрабатыцы Ганна Гуськова пракаменціравала свой рэзультат пасля цырымоніі ўшанавання ў снежным парку Геньцін, паведамілі БЕЛТА ў прэс-службе НАК.
"Калі прызямлілася пасля вырашальнай спробы, зразумела, што зрабіла ўсё, што магла. Эмоцыі перапаўняюць! Адзначу, што гэты скачок мінулы раз я рабіла ў Пхёнчхане чатыры гады таму. Рашэнне выконваць такі складаны скачок мы прынялі ўжо на схіле, калі пасля другой спробы я зразумела, што трэба ісці ва-банк. Была ўпэўнена ў сваіх сілах, праўда, яго было вельмі складана зрабіць, таму што ў мяне ён быў толькі ў галаве", - расказала спартсменка.
"Вялікі дзякуй усім, хто за мяне перажываў, падтрымліваў, балеў, мы зрабілі гэта разам. Я не магу паверыць сваім вачам, што гэта адбылося. Ура!" - дадала Ганна Гуськова.-0-
