15 жніўня, Мінск /Кар. БЕЛТА/. Гандбалісты мінскага СКА занялі 6-е месца на турніры ў расійскім Стаўрапалі, паведамляе карэспандэнт БЕЛТА.
У паядынку за 5-е падагульняючае месца віцэ-чэмпіён і ўладальнік Кубка Беларусі ўступіў у серыі пасляматчавых пенальці краснадарскаму СКІФу - 28:31 (гульнявы час - 27:27). У стартавым матчы групавога этапу падапечныя Ігара Папругі таксама ў серыі пенальці прайгралі саратаўскаму клубу СГАУ - 33:35 (гульнявы час - 31:31), потым разграмілі рэзервістаў стаўрапольскага "Віктора" з рэзультатам 46:24, а затым былі слабейшыя за асноўны склад "Віктора", які ў гэтым сезоне ўзначаліў беларус Сяргей Гарбок, - 29:35.
У выніку яго каманда стала пераможцам гэтых спаборніцтваў, адолеўшы ў вырашальным паядынку 20-разовых чэмпіёнаў Расіі гандбалістаў клуба "Чэхаўскія мядзведзі" з лікам 26:20. У матчы за бронзавыя ўзнагароды маскоўскі ЦСКА з беларусам Міхаілам Жылам у складзе перамог СГАУ з рэзультатам 33:28.
Вярнуўшыся дадому, гандбалісты СКА прадоўжаць падрыхтоўку да старту новага сезона. У матчы за Суперкубак Беларусі армейцы 10 верасня ў гасцях сустрэнуцца з чэмпіёнам краіны клубам "Мяшкоў Брэст".-0-
